Timogah deka dikerembai ke selampur Borneo

KUCHING: Timogah (Timogah.com) keran nyadi pelasar orang bumai enggau peranak menua pesisir ngelakuka produk sida ngagai penguna naka diatu.

Taja ba timpuh Atur Tagang Pejalai (PKP) udah ba renggat keempat, tang asil utai tanam ba kandang menua pesisir terus dibantu enggau dijual terus ari ladang ngagai rumah penguna nengah aplikasyen digital tu.

Berebak enggau nya, Pemungkal Timogah benama Heineken Laluan, 36 taun madah, Timogah diatu deka merambu ngerembaika servis sida kelebih agi ba selampur Borneo mungkur Sarawak, Sabah enggau Kalimantan Indonesia.

“Nya kebuah, kami deka nesau enggau mantu mayuh agi orang bumai, pedaja mit sereta pengempu produk utai tanam ba Borneo tu.

“Kitai deka terus ngemansangka inovasyen teknologi ba pengawa ninting hari enggau mayuh strategi deka dikemansang ngambi ngeranchakka agi utai dijual enggau meri kualiti pemadu manah ngagai penguna.

TEBILANG… Pengeran ngemansangka chap dagang Timogah mujur pengudah chap dagang tu dipilih nyereta TOP 100 Startuo ba Program Instanbul Startup di Instanbul ti disukung SMA mega.

“Pemansang serikat beguna amat ukai semina nambahka untung tang mega meri pangka positif ngagai bekal pemakai ba menua tu,” terang iya ngagai Suara Sarawak.

Ungkup bulan April taun tu aja, Timogah mujur bulih untung lebih ari RM100,000 asil ari jual ninting hari enggau urung lebih ari 1,500 udar diterima sebulan nyengkaum lebih ari 12,000 barang udah dijual.

Terang Heineken, pupu rata untung Timogah ninting bulan diatu iya nya ngelui ari RM100,000.

Ku iya, piak sida udah mantaika chara bebayar nengah digital sereta nerima semua udar enggau bayar online nengah ‘online banking’ tauka ‘cashless’.

“Dalam sehari, kami nerima urung 80 udar lalu diatu, Timogah ngaul kerejasama enggau lima orang bumai tetap.

“Nambahka nya, kami mega ngaul kerejasama enggau komuniti orang bumai ari Pelilih Bau, Siburan, Padawan enggau Serian.

“Timogah mega bekerejasama enggau vendor dichiri ba Tiga pasar besai nyengkaum Pasar Batu 7, Pasar Bandar Riyal enggau Medan Niaga Satok,” ku iya ti benung ngerembaika aplikasyen tu .

Heineken mega madah, Timogah diatu bisi 14 iku staf aja iya nya empat iku pengatur pengawa enggau 10 iku penganjung barang.

Baka chap dagang diri empu, Timogah nya dikumbai tebilang ba jaku Bidayuh Bau enggau Heinekena madahka nama nya ulih nempa pengelain ba chap dagang menua tu.

“Nnegah timbal bala penguna ba media rama, mayuh sida madahka puas ati sereta kualiti pemakai ti agi baru dianjung terus ke rumah ninting hari.

“Pia mega, Timogah diatu udah nerima kerejasama penuh ari Opis Betanam Betupi Sarawak enggau Opis Menteri Betanam Betupi, Pengatur Tanah enggau Pemansang Kandang Menua nyengkaum disukung Kaunsil Multimedia Sarawak (SMA),” ku Heineken ngelansa pasal kerejasama ngemujurka dagang iya.

“Dikearap chap dagang tu deka terus meri pemakai ngagai komuniti menua enggau meri pengandal sentang anak Sarawak pen ulih numbuhka dagang ti maju setipak enggau serikat tebilang di Asia Tenggara kelebih agi ba bidang e-dagang enggau digital tu.

“Chap dagang Timogah tu mega setipak enggau juluk Kepala Menteri Datuk Patinggi Abang Johari Tun Openg ti deka ngerembaika teknologi digital ba pengawa betanam betupi enggau e-dagang nipakka pemansang dunya lebuh bekenaka teknologi digital kemaya hari,” ku Heineken.