KUCHING: Biro Pelajar sitak Pantai Damai seruran chakah mantu nembiak kelebih agi ba pengawa nampung pelajar ngagai tikas ke lebih tinggi.
Menteri Muda Bekal Ai ti mega nyadi Adun Pantai Damai Datuk Dr Abdul Rahman Junaidi madahka pemujur nampung pelajar siti perais ti pemadu besai ngagai nembiak.
“Bala nembiak patut ngena timpuh belajar ba Palan Pelajar Tinggi (IPT) enggau pekara ti beguna sereta nyendia diri nempuh pemar.
Kebuah pia laban pengudah masuk ngagai tikas ke lebih tinggi agi, mayuh pemar ke baru deka ditapi bala nembiak,” ku iya.
Abdul Rahman madah munyi nya lebuh bejaku ba pengawa meri duit belanja nembiak Palan Pelajar Tinggi (IPT) ngagai sitak Pantai Damai ba sebuah hotel ditu, kemari.
Nangkan nya ku iya, pengawa belajar patut nyadi siti pekara ti meseti dalam siti-siti ruang bilik.
“Genap ruang bilik patut ngengkah pengawa belajar nyadi pekara lumur satu.
“Nya alai, nengah duit belanja tu mega nyadi perais ngagai apai indai laban ulih nampung pelajar ngagai tikas ke lebih tinggi,” ku iya.
Kelimpah ari nya ku iya, pengawa belajar endang udah lama dikemeran dalam Biro Pelajar Pantai Damai.
“Tu seriris enggau slogan biro nya ‘Satu Keluarga, Satu Graduan’ ti udah lama dipadahka bepun ari taun 1993,” ku iya.
Bisi 102 iku nembiak ari sitak Pantai Damai nerima duit belanja dikena mantu sida nampung pelajar ngagai (IPT).
