Tinchin perak ditetak lepas seminggu sendat ba tunjuk jari

SARATOK: Raban Bomba enggau Penyah Penusah (JBPM) Saratok mujur netak dua iti tinchin perak ba tunjuk siku nembiak beumur urung 20 taun lemai kemari.

Penusah nyadi, lebuh tinchin ba jari siku nembiak ari Kampung Hilir Kabong majak sendat enda ulih chabut kenyau ari minggu nyin kemari ngujungka iya minta saup raban bomba ditu.

Ketuai Balai Bomba enggau Penyah Penusah Pampang Saratok PPgB Nazry Mohamat madah, piak bomba begunaka awak urung 10 minit datai ngesah pengudah nerima kangau.

“Puji Tuhan dua iti tinchin pirak mujur ditetak piak bomba ngena ‘Ring Cutter’ sereta nadai penusah bukai ke enda disadang.

“Nembiak nya udah dianjung ke sepital Saratok ngambika merubat tunjuk iya ke bisi kembai ketegal tinchin nya,” ku iya nengah sebengkah penerang tadi.

Beduduk ari nya, Nazry ngelalau mensia mayuh berati manah saiz tinchin sebedau ngerasuk ba jari diri dikena nyeliahka penusah ke bakanya nyadi.

“Pilih mih tinchin ti engkeman enggau pemesai tunjuk diri lalu anang tepapa meda gamal tinchin ti semina manah dipeda tang pulaika penusah,” ku iya.

TAT DULU…Raban bomba ari tim ALPHA Saratok benung netak tinchin ba jari nembiak nya.