BINTULU: Menteri Dagang Temuai, Seni enggau Main Asal, Datuk Seri Tiong King Sing bedanji deka mantu Sarawak nambah penerebai bilun dikena ngeranchak sektor dagang temuai ba nengeri tu.
Iya madah, Menteri Dagang Temuai, Industri Kreatif enggau Seni Pemerindang Sarawak, Datuk Seri Abdul Karim Rahman Hamzah seruran mantaika pekara bekaul pengawa nambah penerebai bilun ke Sarawak.
Berebak enggau nya, Tiong meri jamin ngagai Karim deka ngereja pemadu manah tang kededua opis menteri nya patut bekerejasama sereta begulai enggau Premier Sarawak, Datuk Patinggi Tan Sri Abang Johari Tun Openg.
Ku iya, kebuah pia laban kededua opis menteri nya meseti ngembuan belanja dikena ngelaku enggau ngemansang dagang temuai ba Sarawak.
“Pekara ti dipadah bala tuai renggat baruh ngagai aku rambau Taun Baru China (TBC) tu, bisi sekeda endur ulih diangkat nyadi palan dagang temuai baka ai wong ti bisi ba Selangau enggau Sibu sereta palan bukai,” ku iya.
Tiong mansutka jaku nya rambau bejaku ba Pengerami Ngelalau Temuai TBC Parti Demokratik Progresif (PDP) ba Balai Suarah Bintulu ditu, sehari tu.
Iya ti mega Presiden PDP enggau Kaban Parlimen Bintulu madahka diri meri sukung penuh ngagai Perintah Sarawak ti betuaika Abang Johari dikena ngetan penyerakup enggau kerejasama ba nengeri tu.






