SIMANGGANG: Tuai komuniti enggau tuai raban bansa (KMKK) patut ngesan pangku pengawa sida nitih ke rintai malin ti udah disedia opis pelilih ngambi sida ngasi agi nyadi jematan entara perintah enggau rayat.

Sapit Menteri Pelajar, Inovasyen enggau Pemansang Penau Sarawak, Datuk Francis Harden Hollis madah, pengawa nitih ke rintai malin nya beguna ngambi institusyen KMKK ulih bejalaika pangku pengawa sida enggau berurun, lurus sereta bisi integriti.

“KMKK patut ngatur aum enggau aktiviti ti ulih meri pemaik ngagai komuniti kelimpah nyendia ripot nyadi bukti betulis ngagai raban opis pelilih.

“Sida mega patut nerang pasal belanja ti dikena sida ngagai ejensi perintah engkau komuniti nyadi bukti pengelurus engkau integriti KMKK ba genturung sida empu,” ku iya.

Harden bejaku munyi nya rambau bejadi Program Nyua Setipikit KMKK disitak Kunsil Nengeri (DUN) Simanggang di Palan Servis DUN Simanggang ditu, ensanus.

Iya ti mega Kaban Kunsil Nengeri (ADUN) Simanggang madah, institusyen KMKK beguna amat nyadi jematan ti nyambung Perintah Sarawak engkau komuniti renggat baruh.

“Perintah Sarawak deka KMKK nyadung polisi pemansang ti dibai perintah kemaya hari lalu nya beguna mantu ba pemansang komuniti di nengeri tu.

“Nya alai, aku ngarap KMKK ulih bejalaika pangku pengawa sida enggau manah ke pemaik pemansang nengeri tu,” terang iya.

Dulu ari nya, bisi empat tuai komuniti engkau 39 tuan raban bansa disambung kunterik sereta nyiri empat tuai raban bansa ti baru engkau siku ex-tuai raban bansa nerima setipikit ngaku.

Bela datai, Pegawai Opis Pelilih Sri Aman, Shariff Bujang, Temenggong Leonard Libau Anol, Pemancha Lee Shiang Hua, pengari Opis Residen Bagi Menua Sri Aman sereta staf Opis Pelilih Sri Aman.