KUCHING: Servis Perintah Sarawak majak tegap ari pengelandik enggau pengelurus ngatur belanja nengeri. Sekretari Perintah Sarawak, Datuk Amar Mohamad Abu Bakar Marzuki madah, nya ditegap nengah atur pengawa bepelasarka asil penatai pemisi, bekenaka kereban ngatur belanja digital enggau ngemeran prinsip pemeruan ba bajet.
Ku iya, bemacham inisiatif udah dipejalai ba sistem pekara wang sektor perintah nengeri, nyengkaum ngira enggau betul, bajet bepelasarka penatai pemisi enggau bekenaka teknologi digital.
“Inisiatif tu sebagi ari pengeransing nambah kualiti, pengelandik sereta pemujur sistem ngatur belanja Servis Perintah Sarawak,” ku iya.
Abu Bakar nyebut pekara nya lebuh Program Bejadi Konferens Transformasyen Ngatur Belanja Sektor Perintah (PSFTC) 2025 ti dipenyadi Premier Sarawak, Datuk Patinggi Tan Sri Abang Johari Tun Openg ditu, ensanus.
Iya madah, pengawa ngatur belanja perintah patut berubah tauka transformasyen ti besai bepelasarka inovasyen lalu enda nitih chara lama.
“Kitai patut ngubah runding lama, lalu belabuh berati ke asil, empas sereta rega mata duit,” ku iya.
Abu Bakar mega bisi nyebut pemesai reti numbuh bajet meruan, ti ngena prinsip Rampa Menua, Sosial enggau Atur Pengawa (ESG) sereta ngadu pelin meri penatai pemisi baru ba landskap ngatur belanja sektor perintah kemaya hari tu.
Ari transformasyen nya ku iya, juluk Sarawak ngadu servis perintah ti ukai semina bisi inovasyen ari sukut ngatur belanja aja, tang nibak penemu rayat enggau nyamin pengelantang timpuh panjai.
Nya alai, iya ngelalau semua ke gawa perintah, ejensi perintah enggau Serikat Bekaul Perintah (GLC) beambi ulih ba peluang ke bisi ba konferens nya dikena mandang ubah ti meruan enggau nguntungka rayat.
