Triz: Inisiatif baru Unimas

KOTA SAMARAHAN: Universiti Malaysia Sarawak (Unimas) nyadi organisasyen keterubah di Asia Tenggara enggau Borneo matih staf pengatur enggau pemesai profesional ba program Latih Teori Mutar Penanggul Inventif (Triz).

Chairman Komiti Direktor Unimas Tan Sri Panglima Sulong Matherai madah Triz tu sebagi ari inisiatif baru dipejalai di Unimas.

“Triz tu sebagi ari teori mutarka penanggul nengah penemu enggau chara ulih diterima runding tauka logik, ukai ari peragam.

“Tambah mega inovasyen enggau transfomasyen tu ukai pekara baru ba Unimas,” ku iya madah nyemetak.

Sulong mansutka jaku nya lebuh bejaku bejadika Triz di Palan Islan Tun Abang Salahuddin (Pitas) Unimas ditu, kemari.

Berebak enggau nya, Mandal Chanselor Unimas Profesor Datuk Dr Mohamad Kadim Suaidi madahka sida berengkah numbuhka tim mansik enggau pekara bekaul inovasyen (innovation circles) ba Unimas ungkup produk enggau servis pemansang inivatif.

“Sepenyampau 205 iku pemesai deka dipatih ti nyadi sebagi ari renggat pengawa ngerembai guna Triz selampur Unimas.

“Dalam minggu tu, sepenyampau 62 iku pemesai profesional enggau pengatur deka dipatih nengah renggat keterubah Triz,” ku iya nampung.

Pengudah renggat keterubah tembu, sida deka nyendiaka anugerah nyerumba konvokesyen ti dikearap nyadi sebengkah projek ti inovatif agi di Unimas.

“Kami mega udah matih 700 nembiak ari sekeda fakulti baka Fakulti Perubatan, Fakulti Kejuruteraan, Fakulti Ekonomi dan Peniagaan sereta fakulti bukai lalu merambu nyendiaka kus kedua Triz ba semester deka datai.

“Berebak enggau nya, inisiatif tu mega deka dikena kitai matih bala nembiak ba taun keterubah tikas degree,” ku iya nampung.

Taja inisiatif tu nadai ngaul pengawa beranakka puku manggai bejuta ku Kadim tang Unimas benasip amat laban ngembuan orang ti bepenau ngembing Triz renggat tiga ditu.

“Kitai mega bisi kaban ari palan pelajar tinggi bukai ti mega nyadi tulang be;akang nyukung myTriz tu.

“Diatu, kitai deka ngena Triz mutarka penanggul ba Unimas lalu ngangkatka iya nyadi sebengkah chara revolusyen ti ngemai kitai nyadi orang ti mungkal Triz ba pekara pelajar,” ku iya nerang silik.

Iya mega madahka Triz sebengkah pelasar ti deka ngangkat nama Unimas tu sebuah ari 100 palan pelajar tinggi pemadu manah di dunya.

“Aku meri sukung penuh ngagai chara ti udah dipungkal sehari tu lalu ngarapka kitai ulih nyapai juluk tinggi tu,” ku iya.

Sama datai Sapit Presiden Gerempung Triz Malaysia Tan Eng Hoo, Sapit Mandal Canselor (Pengawa Pansik enggau Inovasyen) Profesor Dr Wan Hashim Wan Ibrahim, Penasihat Kanan Gerempung Triz Profesor Dr Nooh Abu Bakar, Pemesai Rejister Unimas Henry Tening Sengeng, Direktor Institusyen Informatik Sosial enggau Teknologi Inovasyen Profesor Dr Narayanan A/al Kulathu Ramaiyer, bala dekan enggau bala bukai.

Suara Sarawak