Tuah Alena Murang di Argentina

ALENA Murang nempa sejarah baru dalam industri muzik Malaysia udah dipadu menang Anugerah Pisin Pemadu Manah (Best Styling Award) ba Buenos Aires Music Video Festival 2020 di Argentina.

Lagu Midang Midang udah mai tuah ngagai iya ti ngujungka nama iya angkat dalam industri muzik entarabansa.

Rintai nama ti menang anugerah tu udah dibantai ba laman web BAM-V Fest ditu kemari ke alai Alena mujur ngalahka tujuh buah lagu ari mayuh produksyen ba menua luar.

Sebedau tu, lagu Midang Midang tu dichalun ba dua kategori baka Anugerah Muzik Video Entarabansa Pemadu Manah enggau Anugerah Pisin Pemadu Manah.

Anugerah Muzik Video Entarabansa Pemadu Manah tu mega dipasuk Ratu Pop Dunya, Madonna.

NGANGKATKA BANSA… Alena keran ngangkatka raban bansa Kenyah pengudah lagu Midang Midang iya tebal agi ngena jaku lama Kelabit.

Ke penerang semua, lagu Midang Midang nya lagu asal raban bansa Kelabit.

Nya kebuah, pemujur lagu tu ba anugerah tebilang entarabansa mandangka lagu menua tu ulih angkat enggau diterima datai ba tikas dunya.

Sarah Lois iya nya Direktor enggau Stylist dalam muzik video tu seraya pekayan dikena Alena dalam lagu tu asil penemu Alena empu begulai enggau Sarah Lois.

Nambahka nya, siku penganta tebilang, Gebriel Padan udah nganta mua Alena setipak enggau gaya baju dikena Alena enggau bala penari dalam muzik video tu.

Penemu tiga iku anak Orang Ulu ari Sarawak tu mega besai reti laban udah bekerejasama enggau penengkebang pisin enggau aksesori ari penengkebang pisin ari Sarawak.

FOKUS… Pengelelak semua kru enggau bala bukai nyengkaum Alena empu tebalas pengudah lagu Midang Midang mujur bulih siti anugerah.

Tu nyengkaum penengkebang ari Von Jolly Couture, Neng Kho Razali, Raben Beads, Tanoti, Wan Bainun, TeeCode, Karl. Jimmy enggau Maatin Shakir.

Bekaul palan rekoding muzik video tu, sida sebuat udah ngerikod muzik video ba Tanah Tinggi Bario enggau Pantai Tusan, Miri.
Pengawa rekoding muzik video tu mega ngaul kerejasama Project Room enggau Kanid Studio.

Lagu midang midang tu mega ngayanka pemanah rampa menua dikembuan ba Sarawak baka Tanah Tinggi Bario sereta palan bukai.
Pia mega, lagu Midang Midang tu mega mandangka penyelai pisin bala penengkebang pisin datai ba tikas entarabansa kelimpah mandangka pengeraja dikembuan ba menua tu.

Lebuh nengkebang lagu tu, Alena enggau petunggal iya, Joshua ngaduka lagu nya seraya apai enggau ibu iya deka nerangka reti leka jaku ti dikena dalam lagu tu.

Naka tu, Alena udah ngeluarka lagu Pemung Ja’e, Gitu’an (bepadu nyawa enggau Joshua Maran) enggau lagu bukai.

LANDIK… Alena siku penebah sape ke majak beberita datai ba tikas entarabansa.

Ba lansa bukai, Alena mega kala belakun dalam ‘Telemovie Iman Untuk Bulan’ begulai enggau pelakun bukai baka Matthew Ngau Jau, Azwan Kombos, Arafah Edruce enggau Farah Rani.

Telemovie tu pasal Bulan, siku penebah sape ngiga tali sape niang indai iya.

Telemovie tu ngajar kitai pasal juluk ati, kaul enggau pangan diri sereta adat lama.

Ari nya, kitai bela nemu Alena tu ukai semina landik nebah sape datai ba tikas entarabansa tang mega landik belakun.