SPAOH: Pangku pengawa tuai rumah nyadi penyungkak pemansang enggau agen ubah ba sitak menua pesisir terus diaku nipak ke inisiatif meruan perintah negap pemansang komuniti ba renggat baruh.
Sapit Premier Sarawak, Datuk Amar Douglas Uggah Embas nyemetak madah, pangku pengawa tuai rumah beguna amat dikena ngemujur aspirasyen pemansang nengeri kelebih agi nentu genap polisi enggau inisiatif perintah datai ngagai rayat ngasi agi.
Iya mega ngelalau tuai rumah ukai semina nyadi tuai ti dibasa komuniti tang mega nyadi jematan, bisi integriti enggau regas gawa entara perintah enggau rayat.
“Tuai rumah mangku besai pengawa nentu rayat ba sitak sida enda tinggal ari arus pemansang deras.
“Sida nya tuai ba luan ti pemadu semak enggau komuniti,” ku iya.
Uggah madah munyi nya ba Program Merarau Mantar Gawai Dayak 2025 di Balai Komuniti Spaoh ditu, Hari Minggu tu tadi.
Program ninting taun nya mega ngemata pengawa nyuaka surat dichiri baru ngagai sekeda tuai rumah kelai ngenang jasa sida negap komuniti.
Ba pengawa nya mega, perati diberi ngagai Gempung Tuai Rumah (GTR) Rimbas Ulu, siti inisiatif ti ditumbuh kena Ogos 2021 lalu diatu nyadi pelasar beguna nyeraris bantu sereta pemansang sitak menua ulu.
