KUCHING: Sarawak meseti ngasilka tuak ti bekualiti agi, konsisten enggau nitih standard makit nentuka ai nya dikomersial ngagai tikas ti tinggi agi, ku Menteri Industri Pemakai, Komoditi enggau Pemansang Kandang Menua Sarawak, Datuk Seri Dr Stephen Rundi Utom.

Ku iya, produk asal nya bisi pengulih besai dikemansang nyadi produk berega tinggi baka pemujur industri wine ba menua maju.

Taja pia, ku iya, pengawa nya begunaka atur nyeraris ngeluar laban kualiti tuak ti diasilka diatu agi enda konsisten berindik ari pengawa ngena enggau resepi ti bebida ari tiap pengeluar.

“Lebuh kitai nemuai ke rumah panjai tauka ngulu sesebengkah pengerami, kualiti tuak ti diasil enda sebaka.

“Bisi ti manis, bisi ti pait enggau bisi mega masam. “Tu mih ti meseti diperati kitai ari sukut kualiti enggau standardisasyen nyema kitai deka produk tu majak mansang,” ku iya.

Rundi madah munyi nya ba Pengerami Makai Lemai Gala enggau Anugerah Inovasyen 2026 Opis Menteri Industri Pemakai, Komoditi enggau Pemansang Kandang Menua (M-FICORD) Sarawak, ditu malam kemari.

Rundi nerang ke industri wine ba menua baka Australia enggau Perancis mujur rembus makit antarabansa laban bisi standard ngeluar ti konsisten seraya nentuka produk nya diterima penguna ba serata dunya.

Berebak enggau nya, ku iya, Sarawak meseti nyerungkai inisiatif sebaka dikena nambah rega komersial produk menua nyengkaum tuak ngambi ulih dikelaku besai agi lalu ukai semina dikena peranak menua empu.

“Pegawai pemansik (RO) sereta ejensi bekaul meseti ngasil mayuh agi asil pansik ti ulih dikomersial enggau dikena ungkup ngentapka penuduk produk Sarawak ba makit global.

“Aku deka meda pegawai pemansik kitai mantaika asil pansik ti ulih dikomersial enggau dikena ba inisiatif makit kitai ngagai renggat global,” ku iya.

Ku iya, inisiatif matau kualiti beguna amat nyema Sarawak deka ngangkatka tuak nyadi produk bepelasarka agro ti besemekih enggau bisi pengulih makit ti besai agi.

Berebak enggau nya, Rundi mega ngelalau opis enggau ejensi nengah opis menteri iya bisi abis nadai siku pakar pemintar digaga (AI) dikena nyaup ngerumban transfomasyen sereta nambah produktiviti industri nya.

Ku iya, pengawa ngena AI ukai agi nyadi pilih tang meseti nyadi sebagi ari inisiatif nambah pemanah servis, pansik sereta pemansang sektor betanam betupi nengeri.

“Tiap opis tauka ejensi nengah opis menteri tu meseti bisi abis nadai siku pakar AI ngambi ngembing enggau nyaup kitai ngena teknologi nya ungkup tuju ngemanah.

“Kitai enda ulih semina merambu laban tetiap inisiatif meseti ngasilka pemutus ti nyengala enggau meri pemaik ngagai sektor sereta rayat,” terang iya.