KUCHING: Beduduk ari pengawa Adun Ba’Kelalan Baru Bian ningkah pengawa nyukat kelingi tanah Adat Bansa Asal (NCR) di baruh Seksyen 6 Kanun Tanah Sarawak, Sapit Kepala Menteri Datuk Amar Douglas Uggah semina mantaika penerang ti enda ulih ditimbal sentang Baru enggau sida sebilik bulih pemaik ari inisiatif nya.
Sapit Speaker Dun Datuk Gerawat Gala madah, Baru ti mega Kaban Parlimen Selangau enggau sida sebilik nerima pemaik ari pengawa nyukat tanah di baruh Seksyen 18 enggau Seksyen 6 Kanun Tanah Sarawak.
“Nitihka rikod Opis Tanah enggau Survei (JTS), Ketuai Raban Bansa mesti nganjung peminta nyukat tanah ngena Seksyen 6 ngambi ngarika komuniti iya.
“JTS udah ngatur randau enggau komuniti ngambi nerang pasal pengawa nyukat tanah di baruh Seksyen 6 ngambi sida besetujuka atur tu,” ku iya meri penerang, ditu kemari.
Gerawat ti mega Adun Mulu madah, udah tentu Baru enggau sida sebilik enda mantah pengawa nyukat tanah nya tang iya semina enda bemunyi nyentuk Uggah mantaika pekara nya.
“Uggah enda kala mantah hak Baru nyadi peranak asal menua nyengkaum raban bansa bukai kelimpah ngeluarka pala tanah NCR di baruh Seksyen 18 Kanun Tanah Sarawak.
“Pia mega, Uggah enda kala mantaika penerang pasal tanah digazet di baruh Seksyen 6 nya ulih dijual tauka digadai ngagai bank baka ke disebut Baru,” ku Gerawat nerang.
Iya nyemetak madah, Uggah enda kala madah Seksyen 6 nya syarat sebedau nyukat tanah di baruh Seksyen 18 tang pengawa nya jampat agi dipejalai dibanding sebedau tu.
“Ambika banding, penyampau kandang menua ti udah disukat terus ngena Seksyen 18 (ngelaungka Seksyen 6) semina pemesai 260,000 hektar ba timpuh 50 taun enggau [upu rata 5,200 setaun.
“Nangkan nya, 910,000 hektar tanah disukat ngena Seksyen 6 ba timpuh semilan taun enggau pupu rata 101,000 hektar setaun,” ku iya.
Terang Gerawat, asil iya, 29,559 hektar tanah diberi pala tanah ari 90,263 hektar di baruh Seksyen 18 kelimpah pekara tu ngayanka tanah jampat agi disukat ngena Seksyen 6.
“Pengawa nyukat tanah ngena Seksyen 6 sebedau pala tanah dikeluar nengah Seksyen 18 ukai masau jam baka disebut Baru.
“Jaku tuduh ti madahka tanah disukat di baruh Seksyen 6 deka nyadi tanah perintah nya semina jaku tuduh ke enda betul,” ku iya nerang silik.
Iya mega madah, enti amat tanah NCR nya nyadi tanah nengeri baka dipadah nya, JTS enda ulih ngeluarka pala tanah di baruh Seksyen 18 laban nya dikelaung ari disukat di baruh Seksyen 13.
“Minta Baru badu ngeluarka penerang bula pasal pengawa nyukat tanah di baruh Seksyen 6 enggau ngerebut peluang bulih pala tanah di baruh Seksyen 18.
“Baru enggau sida sebilik udah bisi pala tanah ba Trusan Land District lalu tu nunjukka bukti tanah NCR digazet di baruh Seksyen 6 enggau enda lenyau status nyadi tanah perintah,” tandu Gerawat.
