Tujuh agi projek bekal ai di Samarahan tembu 2020

KUCHING: Empat iti projek nambah ke bekal ai ba Bagi Menua Samarahan udah tembu lalu tujuh iti agi projek ti sama deka tembu ba ujung taun 2020 baruh Program Projek Rayat.

Menteri Muda Bekal Ai, Datuk Liwan Lagang ba Aum mansutka pekara nya lebuh nyaut tanya ari Adun Sadong Jaya-PBB, Ir Aidel Lariwoo pasal status kereja nambah ke bakal ai ngagai Bagi Menua Samarahan ba Aum Dun Ke-18 Renggat Keempat, ditu kemari.

Kelimpah nya, iya madah bisi dua bengkah chara dikena nambah ke bekal ai ngagai bagi menua tu iya nya ba jangka pandak nyengkaum nyeruri loji ai beresi ke udah bisi, nyeruri tangki ai ti tiris, ngaga sub marine paip kena nambahka bekal ai ari Lembaga Ai Kuching enggau Asajaya enggau ke bukai.

“Ungkup timpuh panjai, perintah ngena chara nganti entali ai paip ti udah lama awakka enda tesekat enggau pechah, nambah stesyen pam enggau tangki lalu kepenudi ngaga entali ai paip ti beguna.

“Projek ba Bagi Menua Samarahan tu dijangka nelan belanja lebih RM400 juta lalu kus tu dipelanja Perintah Sarawak,” ku iya.

Datuk Liwan Lagang

Nangkan ke nya, Menteri Muda Jalai Tebing Pantai, Datuk Julaihi Narawi madahka kereja nyeruri jalai genturung Jalai Datuk Mohd. Musa ngagai Bulatan G3 ti dipelanja Perintah Besai agi ba renggat pelin enggau nyendia dokumen tender pengudah Value Engineering Lab ti dilanchaka 18 Februari ngagai 22 Februari tu tadi.

Iya nyaut tanya ari Adun Stakan-PBB, Datuk Sri Mohammad Ali Mahmud pasal kereja nyeruri jalai genturung Jalai Datuk Mohd. Musa ngagai Bulatan G3.

“Projek tu meri empas ti besai nya alai Perintah Nengeri Sarawak ngarapka kereja nyeruri jalai tu gaga baka ti udah dijanji Perintah Besai dikena mantu mensia mayuh ngurangka penusah sekut jalai.

“Ari sukut skop kereja projek tu nyengkaum ngaga jalai begembar empat lorong sepanjai 10.7 kilometer, ngaga tiga buah jematan baru, nganti dua buah jematan lama, ngaga dua buah jematan bejalai kaki enggau masang lampu ba sepanjai jalai nya,” ku iya.

Kenu ku iya, projek tu nelan ungkus belanja RM228.4 juta lalu dipelaba bepun bulan Ogos taun tu enggau tembu tiga taun deka datai.

Suara Sarawak