Tujuh kes baru positif Covid-19

KUCHING: Sarawak ngerikod tujuh kes baru positif Covid-19, kemari lalu ngujungka bisi 348 kes positif kenyau kes keterubah diripotka 13 March 2020.

Mandal Chairman Komiti Penyangga Penusah Ngenyit Nengeri (JPBN) Datuk Abdul Karim Rahman Hamzah madahka semua kes nya diatu benung diperubat di Sepital Besai Sarawak (SGH).

Kelimpah ari nya ku iya, bisi 155 kes baru orang dipelaba (PUI) bisi Covid-19 ba nengeri tu, tadi.

“Penyampau nya ngujungka bisi 2,680 kes PUI ba nengeri tu, ke alai 2,155 udah ditemu negatif lalu 177 kes PUI agi nganti pemutus ari makmal,” ku iya.

Abdul Karim madah munyi nya ba aum pemberita di Wisma Bapa Malaysia ditu, kemari.

Ari penyampau nya, bisi 116 kes PUI di Kuching, Serian (22), Samarahan (tujuh), tiga di Bau enggau Miri lalu dua di Sri Aman enggau Bintulu.

Kelimpah ari nya ku iya, piak polis udah ngetanka 13 iku ba nengeri tu ke ngelaban Atur Tagang Pejalai (PKP) lalu 110 udah dikompaun.

“Ari 13 iku nya, tiga di Mukah, dua di Miri enggau Limbang lalu siku di Kuching, Padawan, Sibu, Kota Samarahan, Bau enggau Matu Daro,” ku iya.

Naka kemari, bisi 374 iku orang udah kena kompaun lalu 586 ditan ketegal ngelaban PKP.

Suara Sarawak