Tunda pemansang teknologi menua China

KUCHING: Menua China lebih mansang ba pengawa ngena teknologi dibandingka enggau menua bukai ba dunya tu.

Ketuai Pemesai Eksekutif Serba Dinamik Sdn Bhd Datuk Dr Abdul Karim Abdullah madahka ba mayuh menua ke mansang selampur dunya tu, teknologi IR4.0 udah berengkah dikena ba pengawa ti besai agi.

“Menua ke dulu bekenaka teknologi tu udah ngasaika peneleba sereta nyadi pengiring selampur dunya.

“Ambika chunto, menua China endang ditemu kitai menua komunis lalu sida ngenyauhka diri empu ari menua bukai sereta enda kala terundingka sida ulih dikelala ba selampur dunya,” ku iya.

Abdul Karim madah munyi nya lebuh dirandau siku pengelicha ari Universiti Malaysia of Computering, Science & Technology (Unimy) Profesor Kanan Akbar Ali pasal ‘Toward A Digital Society: Are we ready for disruptive new learning experience?’ ba facebook, kemari.

Taja pia, enti kitai meda utai ke nyadi ba China diatu, kelebih agi ari sukut sida bekenaka teknologi, sida angkat ngagai tikas ti pemadu atas dalam peta dunya, ku iya nerang agi.

Ku Abdul Karim, kuasa pemadu besai ba dunya tu dipegai menua Amerika Syarikat tang enda lama aja China ulih nerima perati ari selampur menua bukai ba dunya tu.

“Tu siti pekara ti enda ulih dikelarika kitai laban enti kitai bejalai ngagai China, kitai ulih meda mayuh kedai mit bekenaka sistem enda ngena mata duit, teknologi robotik.

“Pekara nya ditambahka agi enggau penusah ke dibai pengerekai igi penyakit Covid-19 ke alai robot dikena ba pengawa nyaga sida ke sakit,” ku iya nambah.

Kelimpah ari nya, China mega ngena teknologi ba pengawa mansik kes kelebih agi nyidi mua sida ke ngereja penyalah.

“Baik nya kitai ka tauka enggai, menua ke dulu ngena sereta ngangkatka guna teknologi tu deka mega dunya.

“Nya alai aku pechaya teknologi digital ari IR4.0 tu nyadi pekara ti pemadu besai reti ba kitai lalu deka nyadi pemeri global ti besai ba dunya tu,” ku iya.

Suara Sarawak