KUCHING: Sarawak benung nungkap perambu ngubah nama Opis Betanam Betupi nengeri ngagai Opis Industri Pemakai.

Premier Sarawak, Datuk Patinggi Tan Sri Abang Johari Tun Openg madah, nya seraris enggau industri betanam betupi ti patut majak relevan di menua tu.

“Diatu, kitai bisi Opis Menteri Industri Pemakai, Komoditi enggau Pemansang Wilayah Sarawak (MFICORD), nya alai, ba penemu aku, kitai patut berunding enggau ngerandang pekara nya (ngubah nama opis betanam betupi).

“Utai tu bekau ari buah penemu ti ngumbai betanam betupi nya pengawa bekebun lama.

“Nya alai, kitai deka ngubah buah penemu baka nya awak ulih nempa menijar betanam betupi ti lebih manah ba pengawa dagang,” ku iya.

Abang Johari bejaku munyi nya rambau bejadi Program Gempuru Antarabansa Keterubah Bioteknologi, Betanam Betupi Pintar enggau Dagang Pengelikun Pemakai (BIOSFE 2023) Teknologi Universiti MARA, Malaysia enggau Universiti Chung Cheng Kebangsaan Taiwan di sebuah hotel ditu, tadi.

Ku iya, pekara tu diperunding ngambi ulih ngubah runding baka ni aktiviti betanam betupi diatu ulih diterima kelimpah peminta enggau pengelebih teknologi moden ba sektor nya.