KUCHING: Pelajar Latih Teknikal enggau Vokasional (TVET) bejalaika tanggungpengawa besai dikena nyukung pemansang ekonomi digital.

Menteri Pelajar, Inovasyen enggau Pemansang Bakat Sarawak, Datuk Seri Roland Sagah Wee Inn madah, TVET nyendiaka pengereja pengawa ti bepengelandik sereta bepenau tinggi. “Tu tebal agi ba teknologi pemadah, sains data enggau ke bukai.

“Aku andal Kolej Politeknik enggau Komuniti (POLYCC) ti bepenau mantu menua negapka modal mensia nuju Revolusyen Industri 4.0 dikena nangkup peminta pengereja pengawa ba pemansang ekonomi digital di Sarawak,” ku iya.

Sagah bejaku munyi nya lebuh rambau bejadika Pengerami Konvokesyen POLYCC Zon Sarawak Renggat Keterubah di Dewan Jubli Perak Politeknik Kuching, kemari.

Ngenang silik, Sagah madah, ba Revolusyen Industri 4.0 pemansang digital siti ari batang agenda dikemerat Perintah Sarawak. Berindik ari nya, ku iya, TVET patut dikemeratka raban nembiak nampung pelajar laban ulih ngerandang makit sereta peminta ti tinggi ari industri nya.

“Kemaya hari tu, TVET mega dipeda nyadi ‘game changer’ dalam sistem pelajar ti endang beguna setipak enggau pengeransing kitai negapka TVET di Sarawak.

“Tu dikena nentuka pengereja pengawa menua kompeten sereta kompetitif ba renggat dunya.

“Polisi tu deka mantu nyendiaka bemacham program latih ti bekualiti kelimpah meri penerang teknologi pemadu baru enggau chara ngajar,” ku iya.

Berebak enggau nya, iya ngarapka kerejasama ti enda ngetu entara POLYCC, industri enggau Perintah Sarawak deka dikemeran dikena negapka TVET ngambi dinamik sereta kompetitif agi dudi hari.

Ku iya, nengah kerejasama tu, sida ulih negapka TVET sereta nempa graduet ti profesional sereta bepenau tinggi.

Ngenang pasal pengerami konvokesyen tu, bisi 1,989 graduet udah tembu belajar ba POLYCC.

Sama datai, Sapit Direktor Besai Opis Pelajar Politeknik enggau Kolej Komuniti (Perintah), Pakar Teknologi, Kamaludin Daud.