TVET-Stem nangkup peminta RI4.0

KUCHING: Perintah Sarawak nyendiaka kus pengelandik ti engkeman nengah program Pelajar enggau Latih Teknilal (TVET) sereta pelajar Sains, Teknologi, Engineering enggau Matematik (Stem) dikena kitai nangkup peminta Revolusyen Industri 4.0 (RI4.0).

Sapit Kepala Menteri ti mega nyadi Menteri Pemansang Infrastruktur enggau Perengka Pengangkut Tan Sri James Jemut Masing madah inisiatif tu deka dipejalai nengah opis menteri iya.

“TVET enggau Stem tu beguna amat dikena kitai nyukung pengawa pemansang enggau nyungkak ekonomi menua.

“Tu mega nyendiaka pengawa puang ngagai bala nembiak ti landik enggau bepenau ba pelajar vokasional enggau latih teknikal,” ku iya.

Masing mansutka jaku tu rambau Program Randau Begulai Enggau Nembiak Palan Pelajar Tinggi di Kampus Barat i-CATS ditu, kemari.

Nangkan nya, program TVET enggau Stem tu nipakka polisi pemansang dipejalaika perintah nengeri kelebih agi nuju RI4.0.

“Tu mega dikeandal ulih nempa modal mensia ungkup pemansang menua kelimpah nangkup peminta RI4.0 dunya.

“Kelimpah ari nya, ekonomi digital mega deka nyadi pelasar tegap ba pengawa perintah ngangkatka tikas pengidup enggau nyungkak ekonomi rayat renggat baruh,” ku iya madah nyemetak.

Sama datai Menteri Muda Nembiak enggau Lumba Datuk Snowdan Lawan, Menteri Muda Industri enggau Beranakka Puku Malcolm Mussen Lamoh, Kaban Kunsil Nengeri (Adun) Pelagus Wilson Nyabong Ijang, Sekretari Politik Kepala Menteri Datuk Seri Doris Sophia enggau Direktor Pengatur Konsortium Bumi Consultants Servis Datuk Ir Janang Bungsu.

NYUAKA TEPA… Ketuai Pemesai Eksekutif i-CATS, Mohd Isham Fauzi nyuaka tepa ngagai Masing ba pengawa Randau Begulai enggau Nembiak IPT di Kampus Barat i-CATS, kemari.