LINGGA: Program Kembara D’Astana ditampung ba Pasar Lingga kemari dikena meri peluang ngagai Tuai Pemegai Menua (TYT) Nengeri Sarawak, Tun Pehin Sri Dr Wan Junaidi Tuanku Jaafar enggau bini, Toh Puan Datuk Patinggi Fauziah Mohd Sanusi ngaul komuniti lokal.
Penatai raban nya ba pengkalan Pasar Lingga pukul 10.20 pagi diambat Kaban Kunsil Nengeri (ADUN) Lingga, Dayang Noorazah Awang Sohor, ADUN Bukit Begunan, Datuk Mong Dagang, Residen Bagi Menua Sri Aman, Mahra Salleh, Pegawai Opis Pelilih Lingga, Frank Lani enggau Pegawai Opis Pelilih Sri Aman, Shariff Bujang. Pengudah datai ba pengkalan, raban nya nuju Dataran Lingga ungkup sesyen begambar sebedau nampung pejalai ke Balai Masejit Al-Hana Lingga.
Ba balai nya, Tun Wan Junaidi enggau Toh Puan Fauziah magi awak ngabas bansal pemandang sereta nyain gambar exTemenggong Abang Bohari Abang Zen sebilik kelai ngaku pesaka sejarah lokal.
Dayang Noorazah madah, Lingga dipilih nyadi siti palan Kembara D’Astana berindik ari rega sejarah enggau pemesai reti pelilih nya ba Tun Wan Junaidi.
Iya madah, program nya endang inisiatif Tun Wan Junaidi empu ngena jalai sungai berengkah ari Kuching ke Triso enggau Sebuyau sebedau sangkai ba Lingga.
“Peneleba Tun Wan Junaidi nyadi Kaban Parlimen Batang Lupar ba taun 1990 nyentuk 2004 meri peluang ngagai iya meda kediri empu ubah pemansang Lingga ari pelilih mit nyadi pelilih menua,” ku iya.
Program nya bela dirichahka agi enggau pengawa mandang video pandak asil pansik bala pemansik ari Universiti Teknologi MARA (UiTM) Kota Samarahan pasal Perintah Lingga-Banting ti nyadi sebagi ari sejarah tumu pengawa numbuh perintah ba sitak nya.
Ba program nya, ex-Temenggong Abang Bohari nyua manuskrip pesaka ngagai Tun Wan Junaidi nyadi inisiatif nyaga pesaka sejarah lokal. Bela diatur iya nya pengawa nyua chek sepenyampau RM20,000 ari raban Astana Nengeri Sarawak ngagai Masejit Al-Hana Lingga.
Program ditampung enggau pengawa merarau begulai komuniti lokal sebedau raban nya mupuk pulai pukul 12.30 tengah hari. Bela datai, Penyanding Penemu ba Opis Premier Sarawak, Datuk Amar Jaul Samion.
