KUCHING: Penatai Tuai Pemegai Menua (TYT) Sarawak, Tun Pehin Sri Dr Wan Junaidi Tuanku Jaafar enggau bini, Toh Puan Datuk Patinggi Fauziah Mohd Sanusi ngerichah Pengerami Makai Lemai Serimbai Ngintu Hari Krismas ditu, malam kemari.
Pengerami nya mandangka semangat beserakup enggau bebasa ke pangan diri ti nyadi pugu pengelantang rayat pupu bansa enggau pengarap di Sarawak, kelebih agi begulai ngintu hari besai.
Tun Wan Junaidi enggau bini ngena awak nya limpang berandau enggau bala pengabang ti datai, nyengkaum bala tuai genturung pendiau sereta tuai pengarap Kristian ti sama datai berami.
Pengemerah seduai melaki bini ngerandau bala mayuh mandangka basa besai seduai ke pengarap enggau penyerakup entara komuniti di nengeri tu.
Pengerami makai lemai nya mega digulu Sapit Premier Sarawak, Datuk Amar Dr Sim Kui Hian enggau bini, Datin Amar Enn Ong Seok Ean, Direktor UNIFOR, Datu Georgina Apphia Ngau, Chairman Gerempung Gerija Sarawak, Bishop Donald Jute sereta temuai dipebasa ke bukai.-EDISI UKAS
