KUCHING: Tuai Pemegai Menua (TYT) Nengeri Sarawak, Tun Pehin Sri Dr Wan Junaidi Tuanku Jaafar nyemetak madah, tikas pengelikun kandang tasik Sarawak kelebih agi di Bintulu enggau Miri seriris enggau guna strategik pengelikun menua.

Iya mantai penemu nya pengudah nerima penemuai basa ari Panglima Armada Barat Soldadu Tasik DiRaja Malaysia (TLDM), Laksamana Madya Datuk Baharudin Wan Md Nor begulai enggau bini iya, Datin Shafiqah Ismail ba rumah rasmi Tun Wan Junaidi di Petra Jaya ditu, kemari.

Lebuh nerima penemuai basa nya, Tun Wan Junaidi bela disempulang bini iya, Toh Puan Datuk Patinggi Fauziah Mohd Sanusi.

Ba penemuai basa nya, Baharudin begulai enggau Tuai Pegawai Eksekutif Lumut Naval Shipyard (LUNAS) Sdn. Bhd., Azhar Jumaat meri licha ngagai Tun enggau Toh Puan pasal pejalai projek ngaga Kapal Perang Kandang Tasik 3 (LCS 3) pemadu baru.

Tuju penemuai basa nya nyua surat kangau rasmi ngagai Tun enggau Toh Puan nyadi temuai dipebasa bejadi Program Meri Nama enggau Ngelanchar LCS 3 di Palan Penyangkai Kapal Lumut Naval Shipyard Sdn. Bhd,Perak ti deka diatur kena 9 Februari 2026.

Bepelasarka tradisyen maritim, pengawa nyiri Lady Sponsor ungkup pengawa meri nama kapal nya siti basa pemadu tinggi ti ngelai ngaku enggau sampi pengelikun kapal sereta kru kapal.

Bela datai ba penemuai basa nya nyengkaum Tuai Direktor Tim LCS, Laksamana Keterubah Ir Ts Franklin Jeyasekhar Joseph, Komander Ts Mohamad Idrus Mat Zain sereta sekeda pegawai kanan LUNAS enggau TLDM.

Penatai Toh Puan ungkup bejadi program nya ila ngelambang sukung tegut tuai Sarawak ngagai inisiatif negap kuasa maritim menua sereta pemansang industri nyaga pengelikun lokal.

Tun Wan Junaidi enggau Toh Puan meri terima kasih ngagai TLDM enggau LUNAS berindik ari kangau nya kelimpah besampi semua pengawa enggau program nya lanchar.