KUCHING: Urung 32 ejensi enggau opis perintah bisi ngambi nyadi ‘terabai menua’ nerima pemeri Tuai Pemegai Menua (TYT) Sarawak Tun Abdul Taib Mahmud, kemari.
Tun Taib nyuaka replika chek penyampau RM5,000 ngagai genap ejensi enggau opis nya beserimbai enggau Pengerami Ngirup Teh nyerumba Hari Pengada iya Ke-84 di sebuah hotel tebilang ditu, kemari.
Tuju pemeri nya dikena ngenang pemadas raban terabai menua ke udah berambun nyawa sekumbang pengerekai Covid-19 nuntung menua tu lebih agi nengeri Sarawak.
Berebak enggau nya, mensia mayuh ke bisi datai ngemataka Tun Taib nyirap pulut kuning beserimbai enggau Hari Pengada iya ke Ke-84.
Pengerami tu bela digulu Toh Puan Raghad Kurdi Taib lalu diperindang enggau pengawa belagu ari raban Bakat Anak Sarawak iya nya Ee (Nurul Shida Ee) enggau Mal Imran.
Pemesai bukai ke bela datai iya nya Sapit Kepala Menteri Tan Sri James Jemut Masing, Menteri Dagang Dalam Menua enggau Pekara Penguna Datuk Seri Alexander Nanta Linggi, Speaker Kunsil Nengeri Datuk Amar Mohd. Asfia Awang Nasar, Menteri Pelajar, Sains enggau Pansik Teknologi Datuk Amar Michael Manyin Jawong, Menteri Kaunsil Kandang Menua enggau Pengawa Berumah, Datuk Seri Dr Sim Kui Hian, Menteri Dagang Temuai, Main Asal enggau Seni Datuk Abdul Karim Rahman Hamzah sereta Sekretari Perintah Nengeri Datuk Amar Jaul Samion.
Ungkup penemu entara ejensi ke bisi nerima bantu tu iya nya Opis Pengerai Nengeri, Opis Pengeluar Program, Polis Diraja Malaysia (PDRM) Kontinjen Sarawak, Angkatan Tentera Malaysia (ATM) Sarawak, Dewan Bandaraya Kuching Utara, Dewan Bandaraya Kuching Selatan enggau ke bukai.
