BETONG: Jeman diatu, ubah chukup jampat nyadi lalu semua orang patut sedia nyingkang nitih ubah nya laban jam enda nganti sapa-sapa, nadai ngira pangkat, bansa enggau pengarap.
Kaban Kunsil Nengeri (ADUN) Engkilili ke mega Kaban Kaunsil Dikearap TEGAS, Dr Johnical Rayong Ngipa madah, chukup mayuh ubah mantu ngemuntang pengidup mensia kemaya hari tu.
“Ambika chunto, enti suba nyema deka bekejang ngagai padang bilun tauka ngelawa sebarang palan ke dikeingin ati di mengeri. Dia kitai ngiga teksi ba stesyen teksi, udah ga tambang mar. Tang diatu nyamai kitai ulih ngena Grab ari kaki lima rumah nuju sebarang endur.
“Pia mega, nyema deka meli bup tauka gari. Kitai diatu ulih meli chara online nengah Amazon, Lazada, mindahka duit, bebayarka bil karan tauka kredit kad ngena aplikasyen ke bisi.
“Enda lama agi, kitai deka bisi kerita ke nadai orang deriba. Bala robot udah ulih nyilih kitai ngereja pengawa baka empara temuai, bejait, bebuntas, ngaga langkar begunan, ngaga ubat enggau mayuh agi ke bukai,” ku iya.
Dr Rayong madah munyi nya rambau bejadika Pro-DR Roadshow 2019 di Dewan Panglima Rentap, Betong kena 31 March tu tadi.
Nangkan nya, Dr Rayong madah ba bidang betanam betupi drone ulih dikena menih, nyembur ai, maja, ngerachun enggau nentuka jam engkeman ngetau asil.
“Drone mega ulih mantu mensia ngambi gambar ke tusah diambi. Ubah ke nyadi diatu ukai semina cherita sains tang amat udah bisi semina bedau datai ba menua kitai.
“Diatu dikumbai jeman digital, iya nya semua pengawa mayuh dipuntang ngena automasyen tauka mesin.
“Reti nya mayuh pengawa ke digaga kitai ngena chara lama deka lenyau.
“Enti rayat enda nerima ubah tu, tikas penyeranta enggau penyampau orang nadai gawa deka nambah, pia mega penanggul rama tentu betambah.
“Nya alai, nadai chara bukai rayat meseti berubah,” ku iya nerang enggau nyemetak.
Sama bisi datai Ketuai Pengatur Pengawa TEGAS, Awangku Merali Pengiran Mohamed enggau bala bukai.
