BINTULU: Kaban Parlimen (MP) Hulu Rajang, Datuk Wilson Ugak Kumbong udah dichiri nyadi Charmain Palan Pengelikun enggau Pengerai Pengereja Pengawa (NIOSH).
Berindik ari nya, iya nempa nama nyadi anak Iban keterubah mangku tanggungpengawa nyadi Charmain ba palan nya.
“Aku berterima kasih ngagai Menteri Besai Tan Sri Muhyiddin Yassin, Kepala Menteri Datuk Patinggi Abang Johari enggau Presiden Parti Rakyat Sarawak (PRS), Tan Sri Datuk Amar Dr. James Jemut Masing ke udah meri pengarap ati ngagai aku megai tanggungpengawa ba NIOSH,” ku iya.
Ugak mansut ke jaku nya lebuh ke dirandau pengarang berita, ditu apin lama ke udah.
Ku iya, mangku tanggung pengawa nyadi Charmain kelebih agi ba NIOSH sigi pengawa ke berat.
Iya nyemetak madah mayuh industri kelebih agi ari bemacham bengkah milih NIOSH nyadi kaban sida endur ngambi latih enggau servis bukai ke bekaul pengelikun enggau pengerai pengereja pengawa (OSH).
“Nya kebuah aku ngarap bendar ke bantu enggau saup kelebih agi bekaul enggau pengawa ba NIOSH tu,” ku iya.
Nambah ke nya Wilson Ugak madah, NIOSH nyadi palan ke dikena meri buah runding, latih enggau pansik berkaul pengelikum pengereja pengawa.
Berebak enggau nya, iya bisi bendar pengarap ati ngagai NIOSH ulih nyadi siti ari organisasyen ti nyulut sereta dipebasa beduduk ari sukung ke badas ari semua pengereja pengawa nyengkaum bala industri.
