KAPIT: Peranak Rumah Bansa, Nanga Sebilat, Sungai Gaat, Baleh ditu ti tasah ketegal penusah tanah runtuh kena Hari Satu tu tadi udah nerima perati Kaban Parlimen Hulu Rajang, Datuk Wilson Ugak Kumbong.
Ugak datai ngabas enggau nganjung bantu ngagai tiga ruang bilik ba rumah panjai nya pengudah bilik sida rarat ditabanka tanah tusur ke sungai.
“Sistem paip ditu putus lalu rumah enggau injin api sida mega dilamun tanah ba penusah ke nyadi sehari nya.
“Penerang ari sida beempu rumah, penusah nyadi ketegal ujan bangat nadai ngetu kandang beberapa hari ngujungka struktur tanah tebing sungai rarat.
“Nasip endar nadai penusah bebadi nyawa tauka bakal nyadi ngagai sida serumah. Rumah ke rusak nya ulih diganti tang seput kitai mensia semina siti aja.
“Kitai berasai lantang sida ditu nadai apa nama lalu diatu diau ngenduh ba kaban belayan seraya nganti ngentak rumah baru,” ku Ugak.
Sinu betatika penusah ditapi sida, Ugak nyuaka bantu RM2,000 ngagai tiga ruang bilik kena penusah nya seraya RM1,000 sepintu ngagai lima pintu bilik ti udah runtuh stor. UKAS
