Ukai muntang ngulihka penyenang

Raban nembiak UiTM diperansang nguna pemisi enggau peluang ke udah diberi

“Bala nembiak patut chakah dalam pengawa palan pelajar tinggi sereta enda ngelakka penyakah nya ngachau penyulut dalam akademik lalu ngelimpangka diri ari pengawa 3K (katil, kuliah & kafe).”

KOTA SAMARAHAN: Bala nembiak patut nguna pemisi enggau peluang ke udah diberi kelebih agi lebuh nampung pelajar ngambika ulih ngaga penyambung kaul rama ti beguna.

Rektor Universiti Teknologi MARA (UiTM) Profesor Datuk Dr. Jamil Hamali madah bala nembiak patut ngena perengka guna enggau optimum.

“Bala nembiak patut chakah dalam pengawa palan pelajar tinggi sereta enda ngelakka penyakah nya ngachau penyulut dalam akademik lalu ngelimpangka diri ari pengawa 3K (katil, kuliah & kafe).

“Seruran ngaul diri dalam mayuh pekara kelebih agi ba pengawa dipejalaika palan pelajar baik nya sukarela tauka enda,” ku iya.

Teks jaku iya dibacha Sapit Rektor Bagi Pekara Nembiak UiTM pampang Sarawak Profesor Madya Dr. Mohamad Isa Mohammadin lebuh pengawa bejadika Minggu Destinasi Siswa (MDS) Interim sesi Julai 2019 bepalan di Dewan Jubli Kampus Samarahan 1 ditu, kemari.

Profesor Datuk Dr. Jamil Hamali

Nangkan nya ku iya, bala nembiak patut ngubah ulah ti seruran napatka pekara ti muntang ngagai ulah ti nguji deka napi pemar.

“Nadai jalai ke muntang dalam kitai ngulihka penyenang ba dunya.

“Penusah ti ditapi kita nya mih ke ngajar kitai nyadi orang ti kering ati, ngembuan semangat ti tinggi lalu enda mudah alah napi penguji,” ku iya.

Kelimpah ari nya ku Jamil, kayu ukur dalam siti-siti pemujur nembiak ukai semina bepanggai ba pemujur akademik aja.

“Pemujur mega patut dipeda ari sukut penau sereta peneleba dalam pengawa kokurikulum tauka lumba.

“Pemujur dalam kokurikulum siti bonus lalu udah nyadi siti pekara ti meseti bisi ba nembiak kelebih agi ba makit pengawa,” ku iya nambah.

Berebak enggau nya, Isa mega madah ba jaku iya empu UiTM diatu ba penuduk ke-4 dalam makit pengawa puang di Malaysia.

Ku iya, UiTM mayuh udah mansutka nembiak ti mujur sereta mansutka asil ti ngemegahka nama UiTM ba menua tu lalu tu seriris enggau pinta Industri 4.0.

Urung 2,500 iku nembiak ke nampung ngagai renggat diploma udah ngerejister diri ba Universiti Teknologi Mara (UiTM) pampang Sarawak.

Tu nyengkaum 1,100 di UiTM Kampus Samarahan 1, urung 1,000 ba UiTM Kampus 2 lalu 350 ba UiTM Kampus Mukah.