Projek Loji Pemansut Hidrogen
KUCHING: Projek Loji Pemansut Hidrogen enggau Stesyen Ngisi Minyak keterubah Sarawak udah 100 peratus tembu.
Kepala Menteri Datuk Patinggi Abang Johari Tun Openg madah pengawa nguji loji nya benung dipejalai lalu disadang tembu kena 27 Mei tu.
“Sarawak bisi mayuh pengelebih mansutka kuasa hidrogen ari ai enggau rega ti pemadu mudah sereta ngena kuasa gadung nyadika kuasa hidro.
“Ari pengelebih teknologi diatu, kitai patut sedar pengawa eksport hidrogen ngagai menua luar dudi hari deka nyadi pemansut belanja ngagai menua kitai baka kitai eksport LNG,” ku iya.
Iya madah munyi nya lebuh nyimpul jurai ba Aum Kunsil Nengeri (Dun) ke-18 ditu, kemari.
Nangkan nya, Abang Johari madahka Sarawak mansutka kuasa hidrogen nyadi siti alternatif ngagai kuasa gadung laban kitai ngembuan pemansut ai ti enda putus sereta ulih ditukar nyadi hidrogen dikena perengka pengangkut mensia mayuh tauka asil eksport.
“Menua luar baka Amerika Syarikat, Eropah, Korea enggau Jipun diatu ngeluar perengka pengangkut ngena kuasa hydrogen laban nyaga rampa menua asal sereta ngurangka pemansut minyak.
“Taja pia, ungkus mansutka hidrogen di menua tu jauh mar laban ari beanja kuasa ti besai sereta pemansut ai ti kurang,” ku iya.
Diatu, Sarawak bekerejasama enggau Linde Group iya nya sebuah serikat pemadu besai dalam industri gis enggau hidrogenik sereta serikat pemadu besai ba pengawa mansutka kuasa hidrogen ngena elektrosis ai dalam projek tu, ku Abang Johari nerang silik.
Ku iya, Sarawak bisi tiga bas ngena kuasa hidrogen ti nyadi sebagi ari projek pemungkal sereta pansik ngambika kitai ngembuan sistem pengangkut ti manahka rampa menua asal.
