Ulah Intergriti, Ombudsman udah lama diajar ba sekula

KUCHING: Sistem pelajar ba menua tu endang udah lama ngajar nembiak sekula bekaul enggau intergriti sereta Ombudsman.

Menteri ba Opis Kepala Menteri (Intergriti enggau Ombudsman) Datuk Talib Zulpilip madah taja pia, ba sekula intergriti tu dikena enggau leka jaku bukai tang reti ti sama.

“Nadai leka jaku ‘intergriti’ tauka ‘Ombudsman’ dikena ba sistem pelajar nembiak sekula.

“Tang leka jaku baka ulah ti manah, ngemanahka agi atur enggau proses sereta leka jaku ngatur timbal mensia mayuh endang suah dikena nganti dua bengkah leka jaku nya,”ku iya.

Talib madah munyi nya ngagai aum pemberita lebuh bejadika Kod QR dikena ngerejista Pekit Ngarang Intergriti 2019 di Begunan Baitulmakmur ditu, kemari.

PEKIT NULIS INTERGRITI 2019… Talib enggau bala bukai begambar ngelakuka Pekit Ngarang Intergriti 2019.

Nangkan nya, iya madah pekara nya ngasuh leka jaku intergriti enggau Ombudsman tu baru didinga lebih agi ngaga bala nembiak sekula.

“Nya alai, pengudah berunding enggau raban Gerempung Penulis Sarawak ti mayuh ngembuan ex-pengajar ti udah lama gawa dalam opis perintah, Pekit Nulis Intergriti mega dibuka ngagai nembiak Primari Satu ngagai Primari Enam.

“Dalam pekit tu mega deka disediaka pilih topik ti muntang sereta nyamai ditemu bala nembiak,” ku iya.

Ku iya, piak Unit Intergriti enggau Ombudsman (Union) pechaya enggau kerejasama bala pengajar nerenak ulah nembiak ngena Jaku Melayu tauka English ba sekula enggau program ti ngerinduka ati, tu deka ngemuntangka agi penerang bekaul Intergriti enggau Ombudsman dipadahka ngagai komuniti.

“Nya alai, Union enggau Penulis udah besepenemu deka nyendiaka perais ‘Hadiah Penyertaan Terbanyak’ ngagai sekula primari tauka sekundari ti paling mayuh enggau pekit tu.

“Asil tulis pemekit ba pekit tu deka nyadi hak Union, laban kitai ba Sarawak tusah deka mansutka buku bekaul enggau ank mit,” ku iya.

Sekaligus tu deka nambahka koleksyen buku ti dipansutka anak Sarawak, ku iya nambah.-BARINA N

Suara Sarawak