TUSUN SATU

UNDING anak Undom, 39 taun, siti nama ti chukup dikelala komuniti betanam betupi, kelebih agi ba menua Saratok enggau kandang menua ngelingi nya.

Peranak asal Rumah Matalie, Meruji Kabo nya madahka diri endang ada, mansang besai lalu ngentapka pendiau enggau pengidup diri ba menua asal iya empu.

Udah nirika ruang bilik enggau bisi siku anak lelaki, nya ke ngasuh iya ransing agi ngemansangka diri ba pengawa betanam betupi, ti mega nyadi pun jereki ke sida sebilik.

“Nyadi penatai asal aku endang peranak menua Meruji Kabo, Saratok empu.

Aku tu anak lumur dua ari kami lima iku diri menyadi tampung pala, anak orang bumai.

“Apai kami, Undom anak Ngadan, asal orang Meruji Ulu, Saratok lalu indai kami benama Umang anak Koai, peranak asal ari menua Tegan Lempa Kabo, Saratok mega.

“Aku besekula naka tikas Diploma ba Politeknik Kuching Sarawak pengudah abis Pom Lima, lalu mujur nembuka pelajar diri dalam taun 2008.

“Sepengudah nya aku bulih pengawa lalu berengkah gawa ba siti kompeni ba menua Semenanjung din, gawa dalam bidang telekomunikasyen belabuh ari taun 2010.

“Aku nirika ruang bilik ba taun 2012 suba, pengudah dua taun ngidupka diri bekuli di mengeri, lalu bisi siku anak lelaki ke meri penampak ngagai ruang bilik kami duai,” ku iya ngepunka randau.

PENGUJI BESAI

Ba taun 2022, ku Unding, sida sebilik napi penguji besai ti nyau deka ngasuh iya mati akal, pandak kira enggau nadai runding baka ni deka neruska pengidup.

Iya madah, penguji ke datai nuntung maya nya chukup besai lalu orang ti nyadi tiang sukung lebuh nya endang sida sebilik, apai indai, bini enggau anak sereta bala menyadi.

“Aku napi siti penguji dalam pengidup aku iya nya aku kena serangan saraf mata ba kededua leka mata aku, nya ti ngujungka mata aku enda meda lalu tauka buta.

“Lebuh terubah kena penguji ba pengerai mata tu, aku endang nadai meda utai sekali-sekali.

Utai dipeda semua petang tegayam.

“Engka baka tu asai pengidup ditapi orang ke buta mensena ngelama tu, ku sagam anak ati aku maya nya.

“Maya nya mega, aku lalu dipasuk kami sebilik berubat ba siti sepital peribit ba Semenanjung din laban nadai daya bukai kelimpah ari ngandalka bala lutur ngubat.

“Sepengelama 27 hari aku berubat ba sepital nya, mata tudah aku endang nadai nunjukka bisi belinsur manah sereta nadai kelai pulai manah. Semua kami mupuk irau ati.

“Pengasai ati aku din lebuh nya nadai temu tunga, endang nadai endur nyema laban ngasaika diri udah nyadi buta ba kededua leka mata aku,” ku iya nusui utai ke udah nyadi.

STATUS OKU

Ku Unding nampung baru kenang, nyau pemuas ke berubat, dalam kandang tiga bulan udah nya, dia mata iya bisi insur manah, iya nyau ulih meda mimit.

Taja pia, ku iya, utai ke dipeda enda entu terang baka selama, semina ulih meda rapas utai tauka kerabur aja, kira baka meda senaya utai aja, nadai ta entu nyengala.

“Nyau kepuas ka berubat, dalam kandang tiga bulan udah nya, dia mata aku bisi insur manah mimit, aku nyau ulih meda mimit. Dia ati bisi ga berasai lantang mimit.

“Tang utai dipeda aku enda terang tauka nyengala tampak baka selama, semina ulih meda utai rapas-rapas tauka kerabur aja, tau disema baka silau manuk.

“Nyentuk sehari tu, mata aku lalu empai pulai manah baka selama. Aku diatu semina ulih meda ba tikas 40 peratus ari orang normal, nya pen utai peda kerabur,” terang iya.

Berindik ari nya, ku Unding, iya ditukuka bala lutur ditepan siti penyakit ke dikumbai Glukoma, iya nya sebansa penyakit bekaul mata, asil ari peresa makmal ti dipejalai.

Surat ari bala lutur enggau sepital mega ngenukuka iya patut diberi enggau nerima status Orang Timpang Pendiau (OKU) Penglihatan tauka OKU Rabun.

“Nyadi aku ditukuka bala lutur ditepan penyakit dikumbai Glukoma lalu aku endang bisi pematut diberi status OKU Rabun, ke mengkang dikena nyentuk sehari tu.

“Ba taun 2022 nya mega, aku lalu ngaga pemutus mulaika diri ngagai menua laban ngasaika diri nyau enda ulih gawa enggau kompeni lama aku nya,” ku iya enggau ati sinu.

PENIMPANG KE PENGELEBIH

Unding madah, iya enda lemi semengat taja dituku status OKU Rabun ketegal sukung tegut ari sida sebilik ti enda kala leju meransang iya angkat baru.

Meda sukung nya, iya nyau berunding baka ni chara ulih neruska pengidup enggau ngiga pun jereki baru dikena melanja sida sebilik laban iya nemu jalai ba mua ti deka ditujah chukup repa.

“Status OKU Rabun tu enda ngasuh aku lemi semengat tang aku meda penimpang tu nyadi pengelebih dikena aku ngemansangka diri enggau ngiga jereki ke kami sebilik.

“Ari nya, aku berunding panjai enggau ngiga akal baka ni chara pemadu engkeman enggau nipakka pengulih diri dikena aku ulih terus napi pengidup ke deka datai.

“Pemuas ke berunding, aku lalu nguji betanamka sayur semak rumah, ngena tinjau mata ke agi bisi maya nya, ukai muntang tang aku meransang diri.

“Ba ati aku, tentu bisi kebuah Petara ngatur jalai pengidup aku baka tu lalu aku patut ngena penimpang tu nyadi pengelebih dikena ngulihka pengidup ke menyana agi.

“Berindik ari pengawa mit nya, aku ngasaika diri ulih mujur ba pengawa betanam sepengudah aku nerima peminta ari orang ke meli sayur ditanam aku.

“Bepun ari kebun mit semak rumah nya mega, aku lalu bebendar agi ngereja pengawa betanam dataika aku nguji pengawa betupika jelu baka babi taja aku OKU Rabun.

“Sukung ari kami sebilik ti seruran merangsang aku ngelama tu nyadi ka pengering aku ngereja pengawa betanam betupi nyentukka aku mujur baka ke dipeda bala diatu.

“Aku enda meda pengurang tauka penimpang diri nyadi ke penanggul enggau penekul ba singkang aku ngemansangka diri, nadai kala ngembuan ati ngeransi diberi penguji baka tu.

“Tang aku nerima penguji tu lalu aku deka mandang ngagai bala bukai, ke alai orang timpang pendiau baka aku ulih mujur baka orang normal bukai,” ku iya nyemetak.

Ku Unding, ari pengawa bekebun mit mega nyadi akar ke mansang besai sereta nyadi sumbuk ngagai batang pengawa iya diatu ke diberi nama Meruji Kabo Agro Farm (MKAF).

MKAF tu mih ke pun jereki enggau pengidup sida sebilik diatu, ukai semina meri jamin pengelantang aja, tang ekonomi ke entap ngagai sida menyanak.

NYADI TELADAN

Nya gaya pun cherita kitai ngenang siku mensia ba baruh hari tu, ti chukup liat ati napi penguji besai lalu ngena penguji nya nyadika peransang iya ngemansangka diri baka orang bukai.

Ba Tusun Dua nangkan tu, aku deka mai randau kami duai bekaul nama bagi pengawa betanam betupi ti dikereja Unding lalu sapa agi orang ti nyumbukka pengerindu iya ngemeranka pengawa ba tanah nya.

Aku dekaka cherita unggal Unding tu ulih meri inspirasyen enggau nyadi teladan ngagai semua kitai, kelebih agi rebak biak ti ulih meda pengulih besai ari pengawa betanam betupi tu.

Tu mega setipak enggau pengawa Perintah Sarawak ti ransing negapka jamin bekal pemakai timpuh panjai nengah Strategi Pemansang Pengudah COVID-19 (PCDS) 2030 nengah asil betambah, numbuh tibang pemakai, pemansang infrastruktur enggau bekenaka teknologi moden.

Kitai sama nemu, perintah nengeri endang meransang rebak diatu ngambi bagi ba pengawa nyungkak ekonomi nengah sektor agro betanam betupi chara komersial nentuka asil belipat.