SIBU: Dua buah rumah sembiang ba sitak Dudong nerima agih belanja sepenyampau RM1.8 juta ari Perintah Sarawak.
Dua rumah sembiang nya nyengkaum Tepikung Gerempung Salim Da Wang Gong ti nerima agih belanja sepenyampau RM1 juta enggau Gerija Methodist Iban Sibu Jaya nerima agih belanja RM800,000.
Chek agih belanja nya disuaka Chairman Parti Demokratik Progresif (PDP) Bagi Menua Dudong, Kaunsilor Datuk Teo Boon Siew ba sebengkah program ditu, kemari.
Rambau bejaku ba program nya, Teo madah, agih belanja nya diberi nengah Unit Pengarap Bukai (UNIFOR) dikena nyeleti dua begunan rumah sembiang nya.
Iya madah, nya bukti penyiru Perintah Sarawak ngagai komuniti pupu bansa ba nengeri tu.
“Genap rumah sembiang semampai nerima perati ti nemban ari Perintah Sarawak ti betuaika Premier Sarawak, Datuk Patinggi Tan Sri Abang Johari Tun Openg,” ku iya.
Nya alai, Teo ngelalau bala penerima ngena agih belanja nya enggau manah sereta nitih pematut ngambi semua bejalai nitih peminta sida sebedau tu.
Ba program nya, iya nyuaka lima laptop enggau empat mesin nyelak ngagai lima Komiti Pemansang Enggau Pengelikun Genturung Pendiau (JKKK) enggau orang kediri ba sitak Dudong.
Bela datai, Sekretari Politik Premier Sarawak, Joshua Ting Fu Ying.
