KUCHING: Universiti Malaysia Sarawak (UNIMAS) majak chakah bejalaika pengawa komersialisasyen pansik laban diatu institusyen nya bisi ngembuan lima kompeni ‘spin-off’ ti ulih meri empas ngagai rega ekonomi nengeri tu.
Mandal Canselor UNIMAS, Profesor Dr Ahmad Hata Rasit madah, pengawa nya setipak enggau fokus universiti ba pengawa ngemansangka teknologi kelimpah ari ngenegapka gaya enggau komersialiska asil pansik.
“Pekara tu mega nyukung tunga kuing Sarawak di baruh Strategi Pemansang Pengudah COVID-19 (PCDS) 2030, kelebih agi dalam meransang ekonomi bepelasarka inovasyen enggau teknologi.
“Kelimpah ari nya, kami mega melabaka penumbuh enam kerusi endowment baru begulai enggau kaban industri ti dipelaba berega RM60 juta,” ku iya.
Iya bejaku munyi nya rambau Konvensyen Injinir Antarabansa Universiti Malaysia Sarawak (UNIMAS) (ENCON 2026) ti dipenyadika Premier Sarawak, Datuk Patinggi Tan Sri Abang Johari Tun Openg ba siti hotel tebilang ditu, kemari.
Ku Ahmad Hata, UNIMAS terus ngerintaika tunga kuing akademik enggau pansik dikena nyukung pemansang nengeri tu enggau meruan.
Ku iya, universiti nya mega ngemeratka tanggungpengawa bekunsi entara universiti, industri enggau mensia mayuh nentuka pemeruan rampa menua.
Iya mega madah, Fakulti Kejuruteraan UNIMAS udah nurai mayuh penyulut ti meri empas tinggi, nyengkaum nengah Palan Ai UNIMAS (UWC) ti ngembing pansik bekaul enggau pengeraja asal ai.
“Sekeda pemansik UWC udah dirintai entara dua peratus saintis pemadu nyulut di dunya ari Universiti Stanford enggau Elsevier ba taun 2025.
“Nengah geran Rentayan Pansik Perintah-Peribit, palan tu mega nyukung inisiatif bekal ai beresi ungkup komuniti menua pesisir,” ku iya.
Iya madah, UNIMAS mega bekerejasama enggau PETRONAS ba pengawa ngaga turbin bio-inspired dalam ngasilka kuasa hidro marin, kelimpah ari ngenegapka sistem bekal ai menua pesisir ba pengawa ngurangka ampuh bah enggau ejensi ke bekaul.
“Kelimpah ari infrastruktur, pengelandik injinir UNIMAS mega mungkur sektor pengerai nengah Palan Bio-Inovasyen enggau Injinir Biomedikal (BBEC),” ku iya.
Ahmad Hata madah, UNIMAS deka terus meri komitmen ngagai pemanah rampa menua laban palan nya udah dirintai dalam 101 universiti pemadu atas di dunya ba Times Higher Education Impact Rankings 2025.
“Semua pengawa tu ngayanka pangku pengawa UNIMAS nyadi pengerembai pemansang ti meruan ti inklusif sereta meri empas tinggi,” ku iya.
