KUCHING: Dikena nagang penyalah siber ti majak nyadi sereta ngirauka ati, Kaunsil Multimedia Sarawak (SMA) deka numbuh Unit Pengelikun Siber.
Menijar Besai SMA, Datuk Dr Anderson Tiong Ing Heng madah, data mandangka kes nya majak nambah ba Sarawak enggau penyampau 1,901 kes ti bisi dirikod ungkup timpuh 1 Januari nyentuk 30 November tu tadi.
Ku iya, penerang ari Opis Pansik Penyalah Komersial Polis DiRaja Malaysia (PDRM) Kontinjen Sarawak madahka penyampau nya nambah 300 kes enti dibanding ba timpuh sebaka ba taun nyin kemari ti bisi 1,601 kes.
“Ba taun tu, bisi 552 kes ngaul penyalah e-dagang, jali bula bisi 299 kes, nipu nengah telefon (252 kes), pengerindu bula (51 kes), nyaru (86 kes), e-pekara wang (135 kes), beranakka puku bula (252 kes) sereta pengawa puang (273 kes).
“Data tu ukai pekara ti patut ngemegah. Nya alai, Perintah Sarawak benung ngerumban pengawa bejalaika Langkar Kereja Pengelikun Siber nengah Unit Pengelikun Siber.
“Inisiatif tu ngemerat pekara bekaul atur pengawa, polisi, pengawa ngasika atur, tungkap, inovasyen, teknologi, ngaga pengulih enggau kerejasama ti ngasi dikena nyaga data mensia mayuh,” ku iya.
Dr Anderson mansutka jaku nya rambau Program Belanda Penyedar Penglikun Siber SMA ti dipasuk 2,000 penyereta serimbai Bulan Inovasyen Servis Mensia Mayuh Sarawak 2023 ba Padang Merdeka ditu, kemari.
