KERETAS, plastik, kaca enggau barang bukai ulih dikena baru.
Enti kitai pintar ngubah barang lama tu, tentu asil nya chukup manah enggau tampak eksklusif lalu ulih dijual dikena nambah penatai pemisi.
Suah agi barang lama tu deka digaga nyadi barang perhiasan nitih kreativiti masing-masing.
Ambi ke chunto, surat khabar lama bisi rega komersial enti diubah nyadi produk kraf ti ulih nambah penatai pemisi.
Enti kitai kreatif, surat khabar lama mega ulih dianyam nyadi bakul, pasu bunga, ketapuk enggau barang bukai.
WASTE TO WEALTH
Ukai naka nya aja, Menteri Kesihatan Masyarakat, Pengawa Berumah enggau Perintah Lokal Sarawak, Datuk Amar Dr. Sim Kui Hian mung kala nyebut pasal konsep WASTE to Wealth lalu enda meda pemansut fizikal aja tang ngasil kreatif enggau inovatif ngasilka produk baru ba industri kitar semula sereta ngaga nya nyadi siti penatai pemisi.
Ku iya, kitai mesti pintar berundingka penemu baru dikena ngintu uras nengah aktiviti enggau projek InnoWaste sereta bechunto ke menua Jerman enggau Jepun ba pengawa ngena baru barang lama.
Mayuh agi enda ngelala ke empas penting ngena baru ba pemerian rampa menua kitai.
Pengawa ngena baru diatu semina disebut nyadi aktiviti enggau ngumpul uras ti nadai mai sebarang ubah ba dunya kitai.
Kebendar, konsep ngena baru barang lama tu bisi mayuh manfaat enti dikereja begulai.
Pengawa belajar ke manfaat ngena baru enggau bekas ulih meri empas positif ngagai rampa menua kitai.
Kala kita berunding ka di semua uras nya? Semua bekas pemakai enggau barang ti dibuai kitai deka ngasuh tempat pembuangan uras penuh.
UPCYCLE
Baka ni chara kitai deka ngurangka mayuh uras ba tempat pembuangan uras?
Entara chara ke tau dikena kitai nya nengah inisiatif upcycle barang ke enda dikena agi nya. Nama reti upcycle kitai?
Sepengelama tu kitai semina suah ninga chara recycle aja.
Ungkup penerang semua, upcycle tu baka ga recycle tang bida iya upcycle tu ngubah barang nya ngambika berega lebuh dijual.
Ambi ke chunto baka seluar jin lama di jait lalu digaga nyadi kantung sandang baru, nyadi lebih berega agi ari barang asal laban dipeda berlainan.
Rega barang ti diubah baru nitihka chara upcycle nya bepanggai ngagai kreativiti masing-masing kitai.
Nya kebuah, Program MILO® Sik Pak X-change tu sebagai ari chara narak komuniti sayau ke rampa menua sereta berundingka chara bukai nentuka uras nya ulih dikena baru.
Raban B40 udah mantai ka penau sereta kreativiti sida ngubah baru barang lama nyadi barang baru ke berega agi ketegal nyukung Program Milo tu.
Ukai semina menua maju aja ti ngemeranka chara upcycle tang menua Malaysia mega udah berunding deka nyaga rampa menua nengah chara tu.
NGUBAH IDUP
Tu nyengkaum Helping Hands Penan ke lebih agi diperintah indu ari raban bansa Penan.
Ketegal nyukung program tu, raban indu Penan udah belajar ngena kertas pemakai enggau kertas Milo nyadi totebag nitihka kreativiti enggau pengelandik sida.
Nambah ke nya, Helping Hands Penan udah ngubah idup komuniti Penan ngambika maju baka raban bansa bukai.
Lebih agi, raban bansa Penan diatu udah nyadi peniaga enggau bisi pengandal ngagai diri empu ngemansang pengelandik sida baka anyam dikena ngiga untung napi belanja sekula ke bala anak. Penemu baka tu beguna amat ngambika kitai ulih ngurangka uras sereta ngintu rampa menua.
Sebenarnya barang dibuai kitai nya bisi rega sereta berega agi enti dijual bepanggai ba kreativiti diri empu.
Program MILO® Sik Pak X-change tu besai reti ngambika meri pendedahan ngagai orang mayuh senentang pemesai guna nyaga rampa menua.
Program baka tu suah amat diatur menua maju ke semampai ngemeratka pengawa nyaga rampa menua sereta ngajar orang mayuh anang muai uras.
Bisi mega program bukai ti dikereja baka Projek CARETon MILO diatu nyadi chara keterubah kitai narak budaya ngena baru barang kitai.
Nya alai, orang mayuh patut nyukung inisiatif upcycle barang tu laban kerejasama Milo enggau orang mayuh ukai semina nyaga rampa menua tang udah nyedia mayuh pengawa gaji ngagai raban B40.
