KUCHING: Parti Sarawak Bersatu (PSB) milih Datuk Wan Abdillah Edruce Wan Abdul Rahman enggau Wilson Entabang dikirai bediri ba sitak Kunsil Nengeri (Dun) Lingga enggau Simanggang ungkup Pengawa Bepilih Nengeri (PRN) deka datai.
Presiden iya, Datuk Sri Wong Soon Koh mansutka pekara tu nengah aum pemberita ke diatur ba Indu Opis PSB di Pending, ngalihari tadi.
Iya madah Datuk Wan Abdillah siku orang ke chukup chakah bejalaika pengawa rama mantu mensia mayuh.
“Iya chukup dikelala mensia mayuh ba renggat baruh, nya kebuah parti milih iya diangkat nyadi chaun PSB ungkup sitak Lingga.
“Iya tu mega uchu ngagai ex-Tuai Pemegai Menua Datuk Patinggi Tuanku Bujang,” ku iya.
Nangkan nya, Soon Koh madah Wilson baru aja pinchin nyadi Sapit Direktor Opis Betanam Betupi Sarawak.
Sama datai Ketuai Nembiak PSB Dr Johnical Rayong Ngipa enggau Sekretari Besai PSB George Lo.
Dulu ari nya, Soon Koh madah program bejadika Pampang PSB Lingga enggau Simanggang ke patut diatur ba sebuah hotel tebilang di Simanggang pagi tadi ditangguh beduduk ari pengerekai igi penyakit Covid-19.
Sebedau tu, PSB udah mantaika nama chalun ungkup sitak Dun Balai Ringin, Opar, Tasik Biru, Engkilili, Batang Ai, Bawang Assan, Dudong, Tamin, Muara Tuang enggau Marudi.
