Wang KWSP RM500 ulih diambi bepun 1 April

KUCHING: Perintah Besai mantaika inisiatif ngemendarka kaban Wang Turu Pengereja Pengawa (KWSP) ngemansutka wang turu sida ti manggai RM40 bilion.

Nya sebagi ari inisiatif Perintah Besai dikena mantu rayat menua tu napi penusah sekumbang Atur Tagang Pejalai (PKP).

Menteri Besai Tan Sri Muhyiddin Yassin madahka nengah inisiatif nya, genap kaban KWSP berumur baruh ari 55 taun ulih mansutka duit simpan ba Akaun 2 diri maksimum RM500 sebulan dalam timpuh 12 bulan.

“Peminta tu ulih digaga berengkah ari 1 April 2020 lalu disadang deka meri penguntung ngagai 12 juta kaban KWSP,” ku iya.

Muhyiddin madah munyi nya ba aum pemberita pengudah ngulu Aum Kaunsil Pengatur Ekonomi di Kuala Lumpur, tadi.

Nangkan nya iya ngarapka inisiatif tu enggau penyampau putung KWSP pengereja dikurangka penyampau empat peratus deka mantu bala pengereja nyimpan duit dikena bebelika barang ke diguna ninting hari.

“Duit ke dipansutka nya patut dikena enggau manah sereta dikena semina meli barang ke diguna lebuh napi penusah diatu.

“Duit nya mega ulih dikena nangkup bayar bil ai enggau bil karan tauka suwa rumah nitihka guna diri empu,” ku iya ngelalau.

Ku Muhyiddin, taja penyampau nya enda mayuh lalu nya asil pemendar gawa ti patut dipansutka pengudah badu gawa, tang perintah ngemendarka duit nya dipansutka naka ke diatu.

“Perintah nemu mayuh entara rayat ba menua tu ke begunaka duit dikena napi penusah ti nuntung kitai diatu,” ku iya.

Suara Sarawak