PUNCAK BORNEO: Sitak Parlimen Puncak Borneo deka disikap tiang pemanchar National Fiberisation and Connectivity Plan (NFCP) ba sitak parlimen nya.
Kaban Parlimen iya, Willie Mongin nyamin deka mutarka penanggul arus penyambung nengah pengawa nirika tiang pemanchar ungkup rayat ditu.
Entara kandang menua ti deka didirika tiang pemanchar iya nya Kampung Puak (Bau), Kampung Danu, Skim Pengentap Baru Tekat Ai Bengoh, Kampung Abang, Kampung Kamug, Kampung Maras, Kampung Muk Ayun, Kampung Simpok, Kampung Gayu, Kampung Bunga, Kampung Baru Mawang, Kem Juara enggau Kampung Bisira Rayang.
Willie ti mega Sapit Menteri Pengawa Bekebun enggau Komoditi madah, diatu pengawa nambahka tiang pemanchar nya diatu ba renggat ditinda.
“Aku seruran beratika penanggul tu enggau berumban betemu enggau Direktor SKMM Sarawak sereta raban iya ngambi mutarka penanggul ditapi komuniti.
“Aku mega suah nerima timbal pasal arus penyambung ti enda deras kelebih agi komuniti endang diau enggau gawa ari rumah kelimpah sida suah meda media rama sekumbang timpuh Atur Tagang Pejalai (PKP) tu.
Ungkup penerang semua, Willie madahka Sitak Parlimen P198 Puncak Borneo diatu udah bisi enam Palan Internet, 41 tiang UPS nyengkaum Smallcell enggau 43 tiang pemanchar Upgrade 3G/4G.
Ari 41 tiang pemanchar UPS tu ku iya, tujuh nya VSAT (Very Small Aperture Terminal) ti mega sistem komunikasyen satelit iya nya ba Kampung Skio, Kampung Gumbang, Kampung Padang Pan, Sapit Pengkalan 4, Kampung Sungai Resit, Kampung Plaman Payang enggau Kampung Sadir, Padawan.
