SIBU: Woksyop Ngerembaika Pantun Iban 2025 mujur enchelakka mata semua pasal pemanah main asal kitai Iban kelebih agi pantun.
Pengajar Peni Nyanggai madah, woksyop nya chukup badas, ngerinduka ati sereta penuh enggau penerang baru.
Ku iya, bala penyereta nyau mereti ke reti pantun, tukuh pantun, chara nengkebang pantun enggau chara ti betul nyadaka pantun.
“Ari woksyop tu, kami belajar senentang reti pantun, tukuh pantun, chara nengkebang pantun enggau chara nyadaka pantun.
“Penemu ari woksyop tu mega nyadi malin ngajar ke ulih dikena bala pengelicha enggau pengajar lebuh ngerembaika penemu pasal main asal nya,” ku iya.
Peni madah munyi nya lebuh dirandau pemberita ba woksyop dua hari diatur ba Rumah Rantai Ugak, Luyang Baru, Skim Sekuau ditu, ujung minggu tu tadi.
Kelimpah ari nya ku iya, woksyop nya diperati ulih narit ati nembiak rebak baru belajarka leka main pantun.
“Seraya ba sesyen licha, aku bulih penemu baru iya nya merati ke leka pantun ari sukut litaricha enggau fonetik.
“Tambah mega, semua tentatif program ti diatur chukup ngerinduka ati kelebih agi pengawa besanggai naku buah inyak enggau gendang pampat.
“Sesyen tanya saut mega ngerawang runding bala mayuh enggau sadang pengerembai litaricha Iban jeman ti deka datai,” ku iya.
Nya alai, Peni ngarap ke woksyop baka nya ulih dikerembaika agi ngagai menua bukai, enti ulih ke selampur Tanah Kenyalang ngambi semua ampit penemu ti menyana ba main asal Pantun Iban.
“Aku arap ke woksyop baka tu dikerembaika agi ngagai endur bukai, enti ulih ke serata menua ngambi semua kitai sama ampit penemu.
“Kerejasama rat semua raban nyengkaum ejensi bukai baka Opis Penyerakup Bansa enggau Gempung Ukai Dikuasa Perintah (NGO) bukai endang beguna endar nentuka pengawa tu ulih diatur besai agi.
“Pia mega, aku arap ke mayuh agi gerempung bukai neladan pemanah pengawa Gerempung Bakat Dayak Sarikei merambu woksyop ke bukai, ambi ke banding woksyop bejawang.
“Enda tinggal, terima kasih ngagai Kaban Kunsil Nengeri (ADUN) Tamin, Ir. Christopher Gira Sambang ti udah ngerandang jalai nyukung pengawa main asal pantun. Ngarap ke pengari rayat kitai Iban ke bukai mega neladan pengawa iya.
“Meri terima kasih enggau tabi puji nuju komiti pengatur Woksyop Ngerembaika Pantun Iban 2025 ti betuai ke Asat Nawin, laban udah liat enggau ransing ati taja mayuh penguji sekumbang merambu enggau maya woksyop nya nyadi.
“Tabi puji mega ngagai bala nembiak redak Rumah Rantai, Luyang Baru, Sekuau.
“Enti ukai kitai, sapa? Enti enda diatu, kemaya?” ku iya netak randau.
