ENGKILILI: Program XPDC 3.0 ti dipejalaika Opis Kereja Raya (JKR) Sarawak meri perati ngagai pengawa matau pemansang projek infrastruktur menua pesisir. Program sekali tu ngelawa projek infrastruktur pemun ba kandang menua Ulu Skrang, Ulu Kota enggau Ulu Entabai.
Program ti dipejalaika ari 12 nyentuk 13 Ogos 2026 nya betuai ke Sapit Premier Sarawak ti mega Menteri Infrastruktur enggau Pemansang Penyangkai Kapal Sarawak (MIPD), Datuk Amar Douglas Uggah Embas. Pejalai nya mega disempulang Direktor JKR Sarawak, Datu Dr Cassidy Morris sereta raban teknikal enggau ejensi bekaul.
Ba hari keterubah, raban tu ngelawa taba Proposed Slope Remedial Works di KM13+800, Ulu Skrang (Q449), ditangkan enggau ngabas projek Proposed Slope Remedial Works di KM21+900, Ulu Skrang (Q449). Udah nya, sida mega ngabas projek nyeruri Jalai Pinchoh, Ulu Skrang (Tinda Baru) dikena matau gaya jalai diatu sereta pemansang pengawa nyeruri ke benung dipejalaika.
Ngalih ke lemai, raban neruska pengawa ngelawa Projek Jalai Ulu Skrang, Lubok Antu (Renggat 2) nyengkaum perengka guna besai baka Jematan Menggong enggau Jematan Penabun sebedau mupuk ngelawa taba projek ba Ulu Kota.
Penemuai nya meri peluang ngagai raban nya meda enggau mata empu pemansang pengawa ba taba projek.
Sida mega ngena peluang nya ngulihka penerang teknikal bekaul enggau tikas pemansang projek, pemar ti ditapi sereta pekara ke patut diperati ba pengawa ti deka datai. XPDC 3.0 mega ngayanka pengeransing perintah Sarawak nentuka projek pemansang infrastruktur dipejalaika enggau mujur sereta meri penguntung ngagai rayat, kelebih agi peranak ba kandang menua Ulu Skrang enggau endur ke semak.
Penemuai ngabas taba baka tu mega nyadi jalai ti beguna dikena matau pemansang projek enggau mata empu sereta nentuka penanggul teknikal enggau peminta peranak menua ulih ditemu lalu diputarka ngena chara ti patut.
Sama bisi enggau program nya Sapit Menteri MIPD, Datuk Ir Aidel Lariwoo; Kaban Parlimen Lubok Antu, Roy Angau Gingkoi; Kaban Kunsil Nengeri (ADUN) Engkilili, Dr Johnichal Rayong enggau Sekretari Mendam MIPD, Datu Chiew Chee Yau. -EDISI UKAS
