DUNGUN: Sapit Menteri Besai, Datuk Seri Dr Ahmad Zahid Hamidi ningkah penemu Presiden Bersatu, Tan Sri Muhyiddin Yassin ti madah ke Perintah Penyerakup merambu nangguh Pengawa Bepilih Nengeri (PRN) Melaka enggau Johor ketegal takut alah.
Zahid ti mega Presiden UMNO madah, Muhyiddin enda patut ngaga peragam bekaul perintah deka nangguh pengawa bepilih baka ti kala dikereja ex-Menteri Besai nya lebuh ngemudi menua sebedau tu.
“Nya kebuah, anang ngumbai utai dikereja iya (Muhyiddin) lalu iya ngasai ke orang bukai pen deka ngereja nya mega,” ku iya pengudah bejadi Maktab Rendah Sains MARA (MRSM) Dungun, ditu kemari.
Iya ngelansa penerang Muhyiddin ti diripotka madah ke perambu nangguh PRN ketegal takut lenyau sukung rayat.
Sebedau tu, Chairman DAP Melaka, Khoo Poay Tiong diripotka merambu nangguh PRN laban deka ngelempung tating rayat ti napi belanja idup niki ketegal penyarut kuasa global.
Zahid nyemetak madah ke kededua nengeri nya nadai niat nangguh PRN laban pemutus madam Kunsil Nengeri (DUN) nya hak mutlak tuai nengeri.
“Tu (PRN) bepanggai ba Tuai Pemegai Menua (TYT), Ke Bawah Duli Yang Maha Mulia Pemangku Sultan Johor enggau Yang diPertuan Agong empau laban hak madam DUN bepanggai ba sida,” ku iya nyemetak. – BERNAMA
