NAMA Nathalie Manik tauka tampak agi dikangau Nathalie Anik majak angkat ba dunya pemerindang di menua tu.
Lagu Jelungan enggau Mutus Ati ti bepadu nyawa enggau Jeffrey Tegong udah ngasuh nama Nathalie majak dikelala sereta suah diundang merindang mensia mayuh ba sebengkah pengerami.
Anak pengkuan ari tiga iku diri menyadi tu mega udah dua taun ngaul diri ba dunya pemerindang.
Ku Nathalie Anik, mayuh kenang manis enggau pait sekumbang nyadi penanyi ba menua tu.
“Lagu Jelungan udah ngangkatka nama aku ba industri muzik Dayak tu.
“Leka lagu Jelungan tu ditengkebang NK Yongai enggau Randhi Enrique.
“Berasai gaga laban lagu Jelungan tu majak dikerindu bala peminat kelimpah suah ditebah ba radio di menua tu,” ku Nathalie tuchum ngenang timbal bala peminat sentang lagu iya.
NADAI NYANGKA
Pengudah lagu Jelungan majak diterima bala peminat, Nathalie Anik ngeluarka lagu baru bepadu nyawa enggau Jeffrey Tegong.
“Udah lagu Jelungan, aku bisi lagu baru bepadu nyawa enggau Jeffrey iya nya lagu Mutus Ati.
“Leka lagu Mutus Ati ti ngembuan tiun ranchak tu ditengkebang Robert Bell Sebuyau,” terang Nathalie ti asal ari Sekabai, Bintulu.
Ba lansa sama, lagu Jelungan diatu udah dipeda lebih 480,000 iku lalu lagu Mutus Ati ti bepadu ngawa enggau Jeffrey Tegong udah dipeda lebih 770,000 iku ba Youtube Kaban Music Production (KMP) Sdn. Bhd.
Nathalie mega nadai nyangka lagu Mutus Ati sekali agi ngangkatka nama iya ba industri muzik tu kelebih agi lebuh nyadaka lagu ranchak.
“Aku nadai nyangka lagu tu dipeda mayuh orang ba Youtube KMP ke alai diatu udah dipeda lebih 770,000 iku.
Kebuah pia ku iya, lagu Mutus Ati tu bebida tiun ke alai lagu Mutus Ati tu lagu ranchak. Tebal agi, lagu Mutus Ati tu endang dipuji bala peminat iya laban seduai iya Jeffrey Tegong bela ngembuan patah nyawa ke chukup manah.
“Puji Tuhan lalu aku meri besai terima kasih ke sukung kita lalu nyangka kami deka ngeluarka lagu baru dudi hari ungkup bala peminat ke seruran nyukung aku ngelama tu.
Iya mega madahka lagu Jelungan tu dipasuk dalam album NK Yongai.
ASAM GARAM MERINDANG
Nambahka nya ku iya, mayuh kenang manis enggau pait sekumbang nyadi penanyi ba menua tu.
“Kenang manis enggau pait sekumbang nyadi penanyi ba menua tu ngajar aku sentang tunga kuing industri muzik tu.
“Bisi kenang nya ngasuh geli ati lalu bisi mega ngajar kitai sentang pemar diasai ba industri muzik di menua tu.
Terang Nathalie, kenang manis ke semampai lekat baka iya nemu baka ni rekuding lagu, shooting, ngiga palan ke manah endur ngaga music video enggau baju ke manah dikena nitihka palan dipilih enggau lagu.
“Lebuh ngaga music video tu, aku meretika gaya orang ngaga music video sebedau tu lalu nya pekara baru ke kala diasaika aku ba dunya pemerindang tu.
“Pengawa nya lempung dikereja laban sida ke bepenau ba pekara tu sigi nyaup enggau ngajar magang,” ku Nathalie ti madahka diri berasai betuah laban gawa enggau bala ti landik sereta enda rangka penemu bekunsika mayuh pekara pasal muzik.
Ngelansa pasal pemar ba dunya pemerindang tu, Nathalie madahka diri naka ulih ngangkatka diri ba industri tu lalu iya berasai lantang ati laban semua lagu disada iya endang diterima bala peminat.
Lebuh nyadi penanyi, genap pengawa endang diperati bala peminat lalu mesti nemu mai diri ngambi enda salah singkang.
“Ba dunya digital kemaya hari, kitai mesti bejimat ngambika enda salah singkang laban media rama tu bisi pemanah enggau pengelemi iya.
TIANG SUKUNG
“Puji Tuhan, semua tim seruran nyaup enggau ngajar aku pekara baru ba dunya pemerindang enggau ngemetul utai ke patut lebuh rekuding tauka ngaga music video.
Iya mega madahka sukung ari Randhi Enrique (produser), NK Yongai, Vanden, Hairee Francis enggau bala bukai beguna amat nentuka dua lagu disadaka iya diterima bala peminat.
“Bala kaban ari Kaban Music Production Sdn. Bhd endang nyaup aku ke baru ba dunya pemerindang tu.
“Betuah amat begulai ba baruh perabung KMP tu laban semua sida nadai rangka bekunsika penemu baru ngagai aku,” ku Nathalie mantaika pengaga ati iya.
Berebak enggau nya, Nathalie madah apai enggau indai sereta menyadi iya mega seruran nyukung singkang iya nyadi penanyi lalu suah meri jaku peransang.
“Kelimpah ari bala kaban ba KMP, apai enggau indai sereta menyadi mega seruran nyukung singkang pejalai aku ba industri tu.
“Sukung ari sida tu meransang aku ransing agi merindang enggau nyadaka lagu ungkup bala peminat.
“Enggau peluang tu, aku meri besai terima kasih ngagai produser, penengkebang lagu Jelungan enggau Mutus Ati, apai indai enggau bala menyadi sereta bala peminat ke enda ngetu nyukung aku ngelama tu.
“Teruska sukung kita ngambika muzik kitai Iban majak diterima enggau diangkat baka muzik bansa bukai.
“Kita mega tau nganjung peminta ngagai radio kitai ngambi nebah lagu Jelungan enggau Mutus Ati tu,” tandu iya.
Nya alai, Nathalie mega madahka diri naka ulih merindang bala peminat enggau nengkebang lagu ke manah agi dudi hari.
Bala peminat ti deka nemu pekara baru ari Nathalie Anik tau meda Facebook enggau Instagram iya, Nathalie Anik.
Ba pengujung randau, Nathalie Anik ngarapka lagu tu majak angkat sebaka enggau lagu bukai sereta dipekit ba industri muzik Iban baka Anugerah Carta Sapa Juara (ACSJ) enggau pekit bukai.
Leka lagu Mutus Ati
Bisi ka nuan dara
Enggau ku ngetanka semaya
Nangi ku enggaika puntan
Rugi ngapa tua bepangan
Nuan nyau nadai rita
Jarang ngayanka mua
Ngasuh ku beraie
Berujan ai mata
Nadai ku sulu lenyau
Nuan sigi tetap ku sayau
Jauh beribu batu
Nuan semak ba dalam ati ku
Pegi ku enda lama
Nitihka pengawa
Ila ti ku pulai
Tua berami besai
Mutus ati ku sanggup nganti
Pemulai nuan ambai
Biar repa menasan jalai
Ku ngarapka nuan datai
Seagi seput ku enda lesi
Pechaya mih nuan bujang
Besumpah mati ku enda ngemudi
Ku ungkup nuan bujang
Aku sulu besampi
Ngajihka tua ulih sekunsi
Aku nemu ati nuan
Tuchi beresi enda ngayah ka pangan
Tua ambai amai pan orang merinsa
Biar ngidup kediri
Petara meda
Hooo.. hoo… hoo…hooo
Komposer: Robert Bell Sebuyau
Leka lagu ditengkebang: Robert Bell Sebuyau
Tiun enggau gitar : Hairee Francis (Francis Five Studio)
Videographer: Vanden Micheal (Hallvard Media Works)
Produser: Randhi Enrique
Pengeluar: Kaban Music Production Sdn. Bhd
