Penyelai adat pupu bansa patut ditan

“Semina orang kitai aja nemu adat enggau main asal kitai ke patut dijaga.”

SERIAN: Rayat Sarawak patut ngetanka geliga iya nya pengelantang enggau adat asal ke tusah dipeda ba endur bukai.

Kepala Menteri Sarawak Datuk Patinggi Abang Johari Tun Openg madah, penyelai adat enggau pengelantang patut ditan genap pupu bansa di Sarawak.

Ku iya, rayat Sarawak patut nyingkang ‘ndi rawang ndi asong’ (segulai sejalai) nyaga enggau ngetanka pengelantang enggau penyerakup ba Sarawak.

“Semina orang kitai aja nemu adat enggau main asal kitai ke patut dijaga.

“Orang luar enda mereti pasal adatu kitai laban sida semina keran ngempu Sarawak aja,” ku iya.

Iya madah munyi nya rambau bejadika pengerami nutup Gawai Renggat Sarawak ba rumah inap desa di Kampung Pichin.

Kenu ku iya, bansa Bidayuh mega megai tanggungpengawa berat ba pengawa pemansang.
Abang Johari madah, bansa Bidayuh patut nguna tanah sida enggau mayuh pemansut asil kelimpah ari padi dikena nambahka penatai pemisi.

“Bansa Bidayuh mandangka semangat segulai sejalai ngambika terus maju ba sukut ekonomi enggau pemansang,’ ku iya.

Ku iya, kitai endang seriris enggau penemu Menteri Besai Tun Dr Mahathir Mohamad iya nya meransang pengawa betanam cash crop dikena ngiga belanja tambah.

Iya mega madah, tanah patut dikemansang enggau manah lalu ukai ungkup dijual taja udah bulih surat pala tanah.

Malam nya, atuk Patinggi Abang Johari bisi nyuaka 246 surat pala tanah ngagai Datuk Michael Manyin.

Bela datai iya nya Sapit Kepala Menteri Datuk Amar Douglas Uggah enggau ex-Sapit Kepala Menteri Datuk Patinggi Tan Sri Alfred Jabu Numpang sereta bala Adun ke bukai.

UNGKUP RAYAT….Kepala Menteri Sarawak Datuk Patinggi Abang Johari nyuaka 246 surat pala tanah ngagai Datuk Seri Michael Manyin.

Suara Sarawak