Sita Jin datai baru enggau lagu Nyurut

Sita Jin iya nya, siku penanyi Iban ke tebilang enggau lagu Nesal diatu datai baru enggau lagu Nyurut bepadu nyawa enggau Celestine Ayie.
Lagu Nesal udah ngangkatka nama Sita ba industri muzik Iban dalam taun 2012.
Ba berita pemerindang di Ruai Suara Sarawak minggu tu, kitai deka bekelala dalam agi enggau Sita kelimpah deka nemu berita ke pemadu baru ba taun 2021 ungkup peminat ti lama udah nganti lalgu solo baru ari iya.
Ku Sita, kelimpah ari lagu Nyurut bepadu nyawa enggau Celestine Ayie, iya mega deka ngeluarka dua buah lagu baru dalam taun 2021 tu.
“Kelimpah ari lagu Nyurut, aku mega bisi dua buah lagu ungkup bala peminat ke lama udah nganti lagu baru ari aku.

SUKUNG MIH… Lagu Nyurut disadaka Sita Jin bepadu nyawa enggau Celestine Ayie.

“Aku berasai chukup gaga laban lagu Nyurut udah mujur masuk dalam Charta Sapa Juara Wai FM.
“Arapka bala peminat terus ngundi lagu Nyurut tu ba Carta Sapa Juara ke baru dichalun minggu tu.
“Meri besai terima kasih ngagai bala peminat ke seruran nyukung lagu tu sereta terus nganjung mendingka lagu tu ba stesyen radio.
“Lagu Nyurut tu mega tau dipeda kita ba Youtube Channel Twin Tone Production.
“Terus ke sukung kita mendingka lagu baru ari aku enggau Celestine tu,” ku iya.
Naka tu, lagu Nyurut udah dipeda lebih 9,700 iku pengudah empat bulan dipandang nengah Youtube Channel Twin Tone Production.
Kelimpah ari nya, Sita mega deka ngeluarka dua buah lagu berentak balada ke tanda terima kasih ngagai bala peminat ke seruran nyukung pejalai iya dalam industri muzik di menua tu.
RINDU MERINDANG… Gambar Sita Jin lebuh merindang ba sebengkah pengawa Fakulti di UiTM Sarawak

PERAMBU TAUN 2021
“Enda lama agi, aku deka ngeluarka dua buah lagu balada iya nya lagu Pengerindu Ka Nuan enggau lagu Enda Sengaja.
“Dua buah lagu tu ungkup bala peminat ke semampai nyukung sereta enda leju ningaka lagu aku ngelama tu.
“Sukung bala kita beguna amat ngambi aku ransing sereta enda mantul ngapa ngasilka lagu pemadu manah baka penanyi bukai,” ku Sita.
Terang Sita, leka lagu dalam dua buah lagu ke deka dikeluar enda lama agi nya ditengkebang iya empu.
“Aku merambu muzik kededua buah lagu nya deka digaga Ajis Projam,” terang iya.
Sita madahka diri berasai gaga lalu enda nyangka lagu Nesal udah ngangkatka nama iya dalam industri muzik tu.
“Kebendar, lagu Nesal nya single keterubah aku dalam taun 2012, kerejasama enggau Jelai Music Production enggau M.O Couture.
“Leka lagu Nesal tu ditengkebang aku empu lalu nya mih lagu keterubah ti ngangkatka nama aku nyentuk diatu,” ku iya.
“Taja lagu Nesal tu udah lama dikeluarka aku tang bala peminat mengkang rinduka lagu tu sereta suah dipinta ba radio,” ku Sita tuchum gaga pengudah lagu Nesal majak dikerindu bala peminat.
Bekaul enggau lagu Nesal dalam Youtube, Sita madahka lagu nya suba kala dipasuk dalam Youtube M.O Couture.
“Lagu nya endang bisi dipasuk dalam Youtube suba tang dipadam laban bisi penanggul bukai.
“Aku enda masukka lagu Nesal nya dalam Youtube aku empu laban aku merambu deka masukka semua lagu nyadi siti album,” terang iya.
NGEMPUNG SEMUA LAGU
MAJAK ANGKAT… Nama Sita Jin majak dikelala pengudah ngeluarka single keterubah Nesal dalam taun 2012.

Peranak asal Sekuau, Sibu tu madahka iya merambu deka ngempung semua lagu nya dalam siti album.
“Pengudah semua tujuh buah lagu dikeluar ila, baru aku ngempung iya nyadi siti album.
“Aku ngarapka bala peminat rinduka semua lagu disadaka aku tu nyengkaum lagu baru Nyurut sereta lagu baru ke bukai.
Anak keempat ari enam iku diri menyadi tu madahka pejalai dalam industri muzik tu mayuh pemar kelebih agi ngaduka taga diri baka kereja tetap, merindang enggau rikoding lagu.
Tang, Sita enda mantul ngapa laban nerima sukung ari sida sebilik, bala kaban enggau bala peminat.
“Pemar nya meransang aku ransing agi ngasilka lagu baru ngagai ungkup bala peminat ke seruran nganti sereta nyukung aku ngelama tu.
“Sukung bala peminat nya mih nentuka aku mengkang dikerindu taja kala ngetu merindang suba laban ke nampung pelajar dulu.
“Sukung ari diri sebilik mega ngasuh aku ransing agi ngemansangka diri dalam industri muzik tu ngambi majak angkat baka penanyi bukai,” ku Sita.
“Kebuah pia laban pengawa belagu tu endang pengawa dikerindu kenyau ari mit suba,” ku Sita.
Sita ti gawa nyadi Eksekutif Pekara Makit ba Valser Oil & Gas Sdn Bhd (Bintulu) madahka iya lama ngetu belagu laban nampung pelajar ba UiTM Sarawak.
TIKAS PELAJAR
SITA JIN

“Berengkah ari Mei 2013 nyentuk June 2016, aku ngetu belagu laban nampung pelajar ngambi Degree Business Admin Major Marketing di UiTM Sarawak.
“Lama ngetu laban nambahka penemu akademik dulu tang aku suah mega dikangau merindang baka dalam kampus empu.
Nerang silik, Sita madahka iya berengkah enggau pekit belagu ngarika sekula lebuh iya ba Primari Enam ba SJK Tong Ah Selangau.
“Udah nya tadi, aku kala ngarika sekula pekit belagu dalam Anugerah Seri Asrama Terbilang.
“Lebuh nya aku bulih lumur tiga ba taun 2008 enggau lumur du aba taun 2009.
“Pemujur dalam pekit dua taun bejurut nya mega chara aku ngansah pengelandik belagu.
“Berengkah ari nya, aku majak rindu belagu sereta suah dikangau merindang dataika aku ngeluaka single keterubah nya.
“Sebedau ngambi Degree, aku mega udah nampung pelajar Diploma in Tourism Management dalam taun 2010 ngagai 2013 ba UiTM Sarawak mega,” ku Sita.
Ukai semina landik belagu sereta ngembuan patah nyawa ke chukup lunak tang Sita tu siku penanyi ke ngembuan pemandai.
Naka tu, Sita udah ngeluarka lima buah lagu iya nya lagu Nesal ke mega lagu solo keterubah iya, lagu solo kedua nya lagu Enda Betah dikeluar ba taun 2015.
Pia mega, lagu solo ketiga nya lagu Peminta Aku dikeluar dalam taun 2018 enggau single keempat nya lagu Bujang Emperaja Mata dikeluar ba taun 2020.
Ba taun 2020, iya udah ngeluarka lagu kelima bepadu nyawa enggau Celestine iya nya lagu Nyurut.
Sita madahka lagu Nyurut nya dikeluar di baruh perabung Twin Tone Production.
“Leka lagu Nyurut tu ditengkebang Wanddie Ibrahim lalu music arrangement nya digaga Ajis.
Barang sapa ke deka nemu berita baru ari Sita Jin tau ngelawa Facebook iya, Sita.

Suara Sarawak