Anang nyalahka perintah

FAS pemadu mayuh nerima agih belanja ari perintah nengeri

“Nya alai, sebarang jaku disebut GB13 bekaul enggau Perintah Nengeri enda mantu FAS, nya siti pekara ti enda betul.”

KUCHING: Anang nyalahka Perintah Nengeri enti sema tim main bol kitai enda nyulut ba main sida, ku Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah lebuh nyaut tanya bekaul enggau penyukung tim Sarawak FA (FAS), GB13 ti madahka Perintah Nengeri nadai nulung main bol menua.

Ku Karim, pengawa main bol Sarawak nerima pemadu mayuh agih belanja sereta bantu ari Perintah Nengeri entara penayuh main ba menua tu.

“Aku pechaya nyau ka tiga suku ari belanja dikena ngemansangka pengawa main bol lebih agi ngagai FAS.

Datuk Abdul Karim

“Nya alai, sebarang jaku disebut GB13 bekaul enggau Perintah Nengeri enda mantu FAS, nya siti pekara ti enda betul,” ku iya.

Karim madah munyi nya lebuh dirandau raban pemberita pengudah pengawa nyain sempekat entara Biro Konvensyen Sarawak enggau ‘The Malaysian Association of Convention and Exhibition Organisers and Suppliers’ (MACEOS) bepalan ba siti hotel tebilang ditu, tadi.

Nangkan nya, iya deka meda FAS diatur enggau manah ba pejalai sida dalam pengawa main bol.

“Lebuh nuan ngiring siti-siti tim, nukar bala pemain enggau pemain bukai tang agi mengkang sama baka nya, nya ukai pemutus ke ngena.

“Tu nyangka beduduk ari penanggul sida ari dalam empu, lebih agi lebuh sapit presiden sida badu, bisi kena buai pengawa sereta ke bukai,” ku iya.

Kelimpah nya ku Karim, duit enda ulih meli semua utai.

“Duit enda ulih nukar chara siku-siku orang nya main tauka nunjukka penau diri.

“Kebuah pia laban enti kitai meri mayuh duit ngagai tim nya tang sida enda diiring sereta diatur enggau manah, bedau tentu sida ulih nyulut dalam siti-siti pengawa,” ku iya nambah.

Karim mega madah Kuching FA entara tim main bol ke sama nerima agih belanja sereta bantu ari Perintah Nengeri, tang sida ulih nyulut dalam pengawa main bol.

Nya alai ku iya, disiplin,atur sereta bala pemain ti manah entara pekara ti ngasuh siti tim nya mujur lalu FAS patut beratika pekara tu enggau dalam.

Apin lama ti udah, ba siti posting dalam Facebook, raban GB13 madahka Perintah Nengeri Sabah mayuh mantu penyulut Sabah FA, tang kini ke tunga Perintah Nengeri dalam mantu FAS.