GPS tetap kering, nadai PSB

KUCHING: Enti nadai PSB, nya enda ngasuh kami (GPS) lemi, ku Sapit Kepala Menteri Tan Sri Dr James Jemut Masing nyaut tanya bekaul enggau Parti Sarawak Bersatu (PSB).

Ku Masing, PSB endang nadai begulai manah enggau sida ngelama tu.

“Enti sida ninggalka kami Gabungan Parti Sarawak (GPS), nya nadai bisi bida ba kami.

“Nya mai pengelebih ngagai kami empu ngelaban orang ti endang ditemu ukai munsuh kami, ari ngelaban munsuh enda temu penatai,” ku iya madah.

Masing madah munyi nya rambau dirandau raban pemberita pengudah Pengerami Ngelaluka Pengabang Gawai Dayak & Ngiling Bidai 2019 diatur Parti Rakyat Sarawak (PRS) di Dewan Gerempung Dayak Bidayuh Nasional (DBNA) ditu, kemari.

Tan Sri Dr James Jemut Masing

Nangkan nya ku iya ti mega Presiden PRS madah sida (PSB) udah meri penerang ti silik ba dini penuduk sida diatu.

“Tu ngemuntangka agi kami ngelaban sida laban kami ngelala sapa ke dilaban kami.

“Aku udah kala ba penuduk nya ba pengelama tujuh taun lalu aku enda belalai ari sesapa tang seruran ngelaban,” ku iya.

Ku Masing, enti PSB ngelaban sida, sida mega deka nimbal baru.

“Enti alah, nadai nemu ku enggau. Enti iya siku kaban politik ti dipebasa, iya patut endang patut meri penerang ba dini penuduk sida diatu, ukai nengah chara ‘main belakang’,” ku Masing madah bekaul enggau pemutus Presiden PSB, Datuk Seri Wong Soon Koh ti deka narit diri ari kabinet nengeri.

Kelimpah ari nya, iya madah Wong patut meretika sebarang pekara digaga iya deka bisi timbal ari pekara nya.

Aku nadai ngasaika iya meretika nama utai dipadah iya empu, ku Masing nambah.

Dua hari ti udah, Wong Soon Koh madahka diri iya nadai mai reti ngarika parti iya ba kabinet nengeri laban ‘kaki enggau lengan’ iya udah nadai agi.

Nya alai, iya deka minta Kepala Menteri ngelalau kemaya sereta bakani chara iya deka ngelengkaka tanggungpengawa iya nyadi siku menteri ba kabinet nengeri.

Suara Sarawak