KUCHING: Pemutus Kaban Parlimen Gabungan Parti Sarawak (GPS) nangguhka Rang Undang-Undang (RUU) Perlembagaan (Pindaan) 2019 disukung Raban Indu Parti Sa’ati Rayat Sarawak (SUPP).
Chairperson iya, Kho Teck Wan madah ubah ti diperambu nya kelalu berumban tang nadai ubah ba status Sabah enggau Sarawak.
Pia mega, iya madahka nadai randau ba renggat Kunsil Nengeri (DUN) Sabah enggau Sarawak laban nitihka Sempekat Malaysia 1963 (MA63), ubah konstitusyen meri empas ngagai nengeri-nengeri Borneo enda digaga enti nadai pemendar ari Tuai Pemegai Menua (TYT).
“ Aku andal sida (Kaban Parlimen GPS) deka besemekih enggau lebih ransing lalu berani bejaku ungkup Sarawak.
“Orang Sarawak kini lebih nemu, belajar sereta bejimat,” ku iya nengah sebengkah penerang kemari.
Nangkan nya, Kho mega mejah Ketuai Pakatan Harapan (PH) Sarawak ti ngaku ngepunka proses berunding pasal MA63, tajapan tiap rayat Sarawak udah nemu pengawa nya dipunka ex-Kepala Menteri, niang Pehin Sri Adenan Satem.
Nerang pasal nya, iya madah runding pasal kuasa entara Adenan enggau Menteri Besai lebuh nya, Datuk Seri Mohd Najib Razak teulihka kuasa pengatur pengawa ti besai ngagai Sarawak dalam pengawa undang-undang, pelajar, perubat, rampa menua enggau jalai raya.
Iya nambah rayat Sarawak diberi peluang ke lebih besai dikena masuk ngagai program belajar ba Universiti Malaysia Sarawak (UNIMAS). Udah nya bisi diatur pengawa berumah enggau lumba entara Sarawak sereta Perintah Besai.
“ Semua ti dipinta Adenan tu iya nya otonomi ungkup Sarawak.
“Kelimpah ari nya, PH besemaya deka meri 20 peratus royalti minyak ngagai Sarawak lalu 50 peratus chukai jual ti digumpul ba Sarawak taja enda ngamatka semaya nya. Sarawak udah dipejuraika enggau ubah Fasal 1(2) Konstitusyen Perintah Besai “ ku iya.
Kho mega nyikap ubah ti diperambu nya semina chara nangguh enggau betukar perintah PH tuju ngagai Sarawak dalam ngulihka otonomi.
Nya alai, iya meransang rakyat Sarawak ngambi terus nyukung Kepala Menteri Datuk Patinggi Abang Johari Tun Openg dalam negika otonomi Sarawak.
“Nama guna merambu Konstitusyen Persekutuan enti rayat agi merinsa kategal kus idup ti majak niki lalu Perintah Besai majak ngetuka projek pemansang perengka guna Sarawak” ku iya.
