“Kitai patut ngembuan penyiru ke jaku Iban, anang malut iya enggau jaku bukai ngambika jaku asal kitai nya enda lenyau”.
Raban nembiak Iban kemaya hari sekalika diau ba kandang mengeri tauka menua pesisir dilalau ngambika besaup ngetanka penulin jaku Iban.
Tu beduduk ari perati diatu chukup balat jaku Iban dibalut enggau enggau jaku bukai sekalika maya bejaku enggau pangan diri tauka nengah media rama.
Nya alai, semua piak patut besaup mutar penanggul tu ngambika jaku Iban ke diguna meruan tulin enggau enda kelalu bebalut enggau jaku bukai ke pemaik rebak dudi.
Pengawa ngetanka penulin jaku Iban tu nerima timbal ke manah ari mensia mayuh.
Nitihku Livina Sari, 27 taun ari Lubok Antu madah semua kitai patut besaup ngetanka penulin jaku Iban.
“Kitai patut ngembuan penyiru ke jaku Iban, anang malut iya enggau jaku bukai ngambika jaku asal kitai nya enda lenyau”.
“Nembiak Iban ke besekula mega anang enda ngambi kelas jaku ngambika sida ulih diajar meruan nitih chara nguna jaku Iban ke betul.”
Nangkan nya, Precia Restilla Lingkong, 22 taun ari Kuching madah, sida sebilik chukup lama diau ba Semenanjun nitih ke apai gawa ngujungka iya enda landik bejaku Iban, tambah mega mayuh bebakih enggau bansa bukai.
“Aku nitih ke apai enggau indai ba Semenanjung Malaysia lalu kami menyadi diau begulai enggau bansa bukai ngujungka aku enda landik bejaku Iban.
Kami sebilik ngena jaku Iban tang mayuh agi bebalut enggau jaku bansa bukai.” ku iya seraya meransang rebak baru meseti puh macha bup Iban nyengkaum berita Ruai, Suara Sarawak ke endang nitih standard atur sepil Iban ba sekula.
Berebak enggau nya, Alberto Austin Rungga, 26 taun ari Kapit madah jaku Iban siti jaku ke patut dikemegah laban ngelai identiti kitai bansa Iban.
“Kitai patut berasai gaga sereta anang malu ngena jaku diri laban nya ngelai identiti kitai Iban.
“Rebak baru meseti nemu nulis enggau bejaku Iban ti betul. Anang malut jaku Iban enggau jaku bukai sekalika enggau jaku Melayu tauka jaku ribai (English)” ku iya.
Kenu ku Alberto, ba sentang penanggul tu tanggungpengawa apai indai chukup besai nyaup ngajar anak sida bejaku Iban ke betul lalu, anang malut enggau jaku bukai maya berandau ba rumah.
“Piak sekula mega meseti bejalaika tanggungpengawa baka chakah ngatur aktiviti nengah kelab jaku Iban, pekit bekaul nyengkaum bepantun, becerita, pidato enggau ke bukai,” ku iya.
Udah nya, Brianna Grace Peter, 22 taun ari Serian madah pangka pemansang teknologi entara kebuah ngujungka nembiak rebak baru terunda-runda enda nitih atur sepil Iban ke betul.
“Diatu pemisi perengka teknologi baka telefon pintar, raban nembiak rindu agi ngena jaku puntang maya naip jaku pesan pandak (SMS) tauka nengah WhatsApp,” ku iya.
Berebak enggau nya, Brianna meransang rebak baru sama gagit belajarka jaku Iban.
“Giga mih penerang ba kamus nyema bisi jaku Iban enda ditemu maya macha bup jaku Iban tauka ba surat kabar,”ku iya.
