PRN12 : Dun Bawang Assan dipelaba ‘angat’

SIBU: Sitak Kunsil Nengeri (Dun) N.53 Bawang Assan diperati entara penuduk ke dipelaba ‘angat’ ungkup pengawa bepilih besai nengeri (PRN) Ke-12 laban Ketuai Pampang Parti Pesaka Bumiputera Bersatu (PBB) Bawang Assan Thomas Romeo Christopher Tegong ngining penuduk nya ungkup PBB.

Iya mansutka pekara nya rambau Pengerami Ngiling Bidai diatur PBB N.53 Pampang Bawang Assan di sebuah restauran ditu malam ensana.

“Besampi mih semua kita ba pampang tu awakka penuduk Dun Bawang Assan tu ulih diempu PBB maya Pengawa Bepilih Besai Nengeri (PRN) deka datai.

“Penuduk Dun Bawang Assan endang dipenggi Gabungan Parti Sarawak (GPS) lalu tentu kitai deka meda PBB bediri ba ditu ila,” ku iya.

Bela datai ngulu pengerami tu Sekeretari Politik Kepala Menteri Daniel Bujal, Chairman PBB Meluan Paulus Dandee Banyang, Sekretari PBB Bawang Assan August Abett, Ketuai Indu PBB Bawang Assan Susana Panyau sereta bala bukai.

JULUK BESAI…Romeo (enam kiba) sereta kaban parti maya ngulu Pengerami Ngiling Bidai diatur PBB N.53 Pampang Bawang Assan.

Nya alai, Romeo ke mega Sekretari Politik Kepala Menteri deka meda kaban parti ba pampang nya bebendar agi gawa dikena nentuka juluk nya ulih japai.

“Penuduk Dun Bawang Assan endang ungkup GPS aja. Nya alai, pampang kami ngeringka GPS lalu nyukung sebarang aja chalun ari GPS ke dipilih,” ku iya.

Iya madah, bala kaban parti ba pampang nya patut nyikap diri lalu regas gawa ngelawa rumah panjai dikena napi PRN ke dipelaba diatur sebedau Jun 2021.

“Kitai deka nentuka penuduk Dun Bawang Assan diempu GPS lalu meri pemujur ngagai chalun kitai. Enda ngira nya ari parti ni lalu manah agi nyema nya chalun ari PBB,” ku tandu iya.

Kenu ku iya, nadai utai enda ulih nyadi dalam politik, gaya politik diatu udah berubah dibanding enggau suba.

Nangkan nya, iya ngelalau bala pengundi anang salah pangkah ba PRN ila laban pendiau kitai dudi hari bepanggai ngagai pengundi empu.

“Pilih mih chalun ke nyengala betul ngiring nengeri tu. Pendiau nengeri dudi hari ditentuka anak Sarawak empu lalu GPS pelasar ke pemadu manah dikena ngarika semua kitai,” ku iya.

Penyandang penuduk Dun Bawang Assan diatu iya nya Dato Sri Wong Soon Koh ke mega Menteri Wangan Kedua dalam kabinet nengeri.

Taja pia, parti ke diiring iya nya Parti Sarawak Bersatu (PSB) ukai dalam komponen GPS ke diiring Kepala Menteri Datuk Patinggi Abang Johari Tun Openg.

Ba PRN 2016, Soon Koh yang bediri nengah tiket chalun terus Barisan Nasional (BN) dibaruh iring Kepala Menteri maya nya, niang Pehin Sri Adenan Satem lalu iya menang majoriti 4,131 undi.

Ba pengawa bepilih belaban lima pegari nya, Soon Koh bulih 9,015 undi ngalahka chalun Parti Tindakan Demokratik (DAP) Stanley Chiew (4,884), chalun ngatika diri Watson Bangau Jonathan Renang (569), chalun STAR Wong Sing Wei (100) enggau siku agi chalun ngati kediri Yeu Bang Keng (63).

Pekara deka ditemu serak tu, kati Soon Koh deka meri awak ngagai PBB laban PSB ukai dalam komponen GPS.

Tauka udah tu ngemataka bisi pengawa besilih penuduk entara komponen GPS maya PRN nya ila.

Penuduk DUN Bawang Assan asal iya dipenggi Parti Sa’Ati Rayat Sarawak (SUPP).