Projek SK Ulu Segan baru tembu 35 peratus

BINTULU: Sebengkah pengawa meri penerang pasal pejalai projek ngaga baru Sekula Primari (SK) Ulu Segan udah dipendingka Menteri ba Opis Kepala Menteri (Menteri Integriti enggau Ombudsman) Datuk Haji Talib Zulpilip, kena Hari Lima nyin tadi.

Pengawa tu mega digulu bala ketuai raban bansa enggau pemesai Opis Kereja Raya (JKR).

Pengudah mendingka penerang, Talib bisi ngatur pejalai ngabas taba diperambu ngentak baru begunan sekula ke ngembuan 12 kelas, buding nembiak enggau 12 rumah pengajar ti disikap perengkaguna bukai.

Adun Jepak nya mega bisi diterang pasal pejalai pengawa ngaga sekula ti udah berengkah digaga 24 Januari 2019 lalu disadang tembu 14 Februari 2021.

Kereja ngaga begunan baru sekula nya diatu manggai 35 peratus tembu iya nya kurang tiga peratus ari perambu timpuh, enti nitih udah manggai 38 peratus diatu.

Kebuah projek tu laun ari timpuh diperambu laban suah napi penusah ampuh bah.

Nya alai chara mutarka penanggul bah udah dipejalai nengah projek mindahka sekula nya ngagai endur tinggi agi.

Suara Sarawak