KUCHING: Polisi ti dipansutka Perintah Gempung Parti Sarawak (GPS) udah mayuh meri pemaik ngagai raban nembiak di menua tu, ku Kepala Menteri Datuk Patinggi Tan Sri Abang Johari Tun Openg.
Ku iya, polisi nya nyengkaum mantu raban melaki bini ke agi biak meli rumah keterubah nengah Skim Bantu Chengkeram Meli Rumah Sarawak.
“Aku irau enggau ungkus pengidup ti tinggi, raban melaki bini ti baru nikah mar meli rumah kelebih agi lebuh beguna duit mayar chengkeram meli rumah.
“Nya alai, perintah nyendiaka siti polisi mantu raban tu enggau nanggung ungkus chengkeram RM10,000 ngagai sida ti deka meli rumah berega baruh RM300,000.
“Ba taun 2022 kitai ngagihka RM10 juta ungkup bayar chengkeram ngagai raban orang biak ti deka meli rumah,” ku iya.
Iya bejaku munyi nya rambau Program Pejalai Nembiak Sarawak 2021 Satok di Palan Aum Borneo Kuching (BCCK) ditu, ensana.
Ku iya, Sarawak pechaya ulih neruska polisi nya bekau ari penatai pemisi ti diterima menua awakka raban nembiak ulih meli rumah enggau bayar ninting bulan ti baruh.
“Berebak enggau nya, perintah nengeri udah minta Opis Kunteriktor Rumah enggau Reta Tanah Sarawak (Sheda) ngaga urung 2,000 unit rumah jelan rega dalam setaun.
“Diatu, puku rata rumah jelan rega ti digaga urung 1,000 ngagai 2,000 unit setaun,” ku iya.
Sebedau tu, iya kala madahka perintah nengeri deka ngayanka Skim Bantu Chengkeram Meli Rumah (HDAS) ba taun baru ungkup mantu raban kurang penatai pemisi (B40) enggau penatai pemisi jelan (M40) di nengeri tu ngembuan rumah kediri.
Ku iya, HDAS nyadi siti bantu baru ungkup B40 enggau M40 nerima projek rumah ulih diempu ti dikemandarka Perintah Nengeri.
Ku iya, kelimpah ari nya perintah GPS mega mantu nengah Endowment Fund Sarawak (EFS) beungkus RM1,000 ti diberi ngagai nembiak ke baru ada seraya bantu nuju indai nembiak RM450 enggau ke bukai.
