SARIKEI: Bagi Menua Sarikei deka bulih 10 iti mesin dialisis dikena nangkup guna berubat pesakit, berindik ari kelai kes penyakit kemi manis majak nambah ba peranak menua nya.
Premier Sarawak, Datuk Patinggi Tan Sri Abang Johari Tun Openg madah, pekara nya dipadahka ari raban lutur di Sarikei kemari.
“Nitihka timbal bala lutur, semua peranak Sarikei dalam tikas pengerai ti manah, tang bisi kelai penambah kes kemi manis ti begunaka perati.
“Kelai penyakit kemi manis nya nambah. Reti nya kita deka begunaka mayuh agi mesin dialisis,” ku iya.
Abang Johari bejaku munyi nya rambau bejadi Program Sarawakku Sayang Bagi Menua Sarikei, ditu, kemari. Iya madah, perintah deka nambahka 10 iti mesin dialisis ngagai Sepital Sarikei dikena ngemuntangka pesakit berubat semak agi sereta enda ibuh ngelawa kandang menua bukai.
Berebak enggau nya, Abang Johari nyemetak madahka pemesai guna nyaga pengerai, nyengkaum ngemeranka pemakai ti manah sereta ngaga aktiviti fizikal dikena nyeliahka penyakit.
“Jaga pemakai kitai. Enti ulih eksesais, eksesais meh. “Umur panjai enti nadai bepengerai nadai meh guna,” ku iya.
Sekeda pemansang bukai deka dikemansang ba Sarikei iya nya perambu ngaga Padang Golf ti dikerindu rayat menua luar bala Korea. Ku Abang Johari, rayat ari menua luar rindu bemain golf kelimpah ulih ngasaika buah nanas manis di Sarikei.






