KUCHING: Latih Nyambut Pengerami Hari Malaysia Renggat Kebangsaan ke diatur ba Stadium Perpaduan ditu tadi mujur.
Pengawa nya dikemujur lebih 1,000 penyereta pemerindang ke ngambi bagi ba pengerami tu sehari tu.
Pengawa latih nya kemari dipungkal enggau pengawa beperindang ari raban koir, pemerindang pemungkal, mandangka video enggau mayuh agi ke bukai.
Sama datai ngemataka pengawa tu Sapit Kepala Menteri ke mega Chairman Begulai Komiti Pengerami Datuk Amar Awang Tengah Ali Hassan, Pemangku Sapit Sekretari Perintah Nengeri Datuk Ik Pahon Joyik sereta bala bukai.
Pengerami Hari Malaysia Renggat Kebangsaan serak tu berambaika jaku ‘Sayangi Malaysiaku: Malaysia Bersih’ lalu deka diatur kena sehari tu (16 September).
Pengawa tu mega digulu bala menteri ari Perintah Besai, Perintah Sarawak enggau Sabah.
Udah nya, bala penyereta pekit ari Sekula Primari Tuan Buyong madah diri berasai gaga laban nyereta pengawa merindang beserimbai enggau Pengerami Hari Malaysia tu.
Mohamad Qamarul Haziq Abusman, 11 taun madah iya gaga nyereta pengawa beperindang.
“Aku nadai takut merindang tang berasai chukup gaga sereta gagit,” ku iya.
Puteri Ellisha, 11 taun iya bisi takut mimit merindang ba pengerami nya.
“Aku berasai takut mimit, tang rindu laban ulih ngambi bagi ba program ke baka tu,” ku iya madah ngagai pemberita, tadi.
